अकोला जिल्ह्याला गरज ७३ हजार क्विंटल बियाण्याची

अकोला   ः लवकरच सुरू होत असलेल्या रब्बी हंगामासाठी ७३ हजार क्विंटल बियाणे लागणार असून यात सर्वाधिक ४२ हजार क्विंटल बियाणे हे हरभऱ्याचे अाहे.

अकोला जिल्ह्यात रब्बीचे सरासरी क्षेत्र सुमारे एक लाख १५ हजार ३०० हेक्टर अाहे. यावर्षी चांगल्या पावसामुळे व खरिपातील पेरणी न झालेले क्षेत्र पाहता एक लाख ३६ हजार ८३० हेक्टरवर रब्बी पेरणीचे नियोजन करण्यात अाले अाहे. यात सर्वाधिक एक लाख २ हजार हेक्टर हरभऱ्याचे क्षेत्र अाहे.

जिल्ह्यात हरभऱ्याचे सरासरी क्षेत्र ७० हजार हेक्टर असून या वेळी त्यात सुमारे ३१ हजार हेक्टरने वाढ गृहीत धरण्यात अाली अाहे. जिल्ह्यात हरभरा वगळता इतर कुठल्याही पिकाचे क्षेत्र वाढण्याची शक्यता नाही. गव्हाचे सरासरी ३८ हजार ३०० क्षेत्र असताना यंदा  ३१ हजार ३०० हेक्टरपर्यंत पेरणी होऊ शकते.

मूग, उडदाची काढणी झालेल्या शेतांमध्ये हरभरा पेरणीच्यादृष्टीने शेतकरी मशागतीच्या कामांना लागले अाहेत. काहींनी पेरणीही धरली अाहे. सध्या जमिनीत अोल असून याचा फायदा शेतकरी घेत अाहेत. परतीचा पाऊस झाला तर अाणखी पिकांसाठी फायदेशीर होणार अाहे.  

हंगामात सर्वाधिक क्षेत्र राहणाऱ्या हरभऱ्याचा बियाणे बदल हा ५५ टक्के अाहे. तरी १ लाख २ हजार हेक्टरसाठी सुमारे ४२ हजार क्विटंल हरभरा बियाणे लागणार अाहे. यासाठी महाबीजकडील ३१ हजार ५०० व खासगी कंपन्यांचे ८५७५ क्विंटल बियाणे राहील. गव्हाचे ३१ हजार ३०० क्विंटल बियाणे लागणार असून महाबीज १५ हजार क्विंटलचा पुरवठा करीत अाहे. ७३ हजार ७८६ क्विटंल बियाण्यापैकी महाबीज ४६ हजार ७४० क्विंटल बियाणे पुरविणार अाहे.