जमीन सुपीकतेविषयी आज पुण्यात चर्चासत्र

पुणे : ''सकाळ-अॅग्रोवन''च्या तेराव्या वर्धापन दिनानिमित्त पुण्यात मंगळवारी (ता. १७) ''जपाल माती, तर पिकतील मोती'' या विषयावर राज्यस्तरीय चर्चासत्र होत आहे. प्रयोगशील शेतकरी प्रताप चिपळूणकर, सुभाष शर्मा, वासुदेव काठे तसेच मृदातज्ज्ञ डॉ. अजितकुमार देशपांडे हे महत्त्वाच्या विषयांवर मार्गदर्शन करणार आहेत. पुण्याच्या टिळक स्मारक मंदिरात दुपारी चार वाजता होणाऱ्या या चर्चासत्राचा लाभ घेण्यासाठी राज्याच्या विविध भागांतील शेतकरी, कृषी शाखेचे विद्यार्थी येत आहेत.  ''अॅग्रोवन'' यंदा तेरावा वर्धापन दिन साजरा करीत आहे. शेतकऱ्यांना अत्याधुनिक शेती, ज्ञान-तंत्रज्ञान, बाजारपेठांची माहिती, यशोगाथा सांगत शासनासमोर शेतीचे ज्वलंत प्रश्न बेधडकपणे ''अॅग्रोवन'' मांडत आहे. विशेष म्हणजे जमीन सुपीकतेच्या दुर्लक्षित प्रश्नाकडे शेती व्यवस्था व सरकारचे लक्ष वेधण्याचा अनोखा प्रयत्न ‘अॅग्रोवन’कडून केला जात आहे. सशक्त जमिनीशिवाय समृद्ध शेती शक्य नाही, हे ठसविण्यासाठी अॅग्रोवनकडून २०१८ हे वर्ष ''जमीन सुपीकता वर्ष'' म्हणून जाहीर केले गेले आहे. जमीन सुपीकतेच्या संकल्पनेला राज्यभर पोचविण्यासाठी या विशेष चर्चासत्राचे आयोजन केले आहे. ते सर्वांसाठी खुले असून, प्रथम येणाऱ्यास प्राधान्य याप्रमाणे सभागृहात प्रवेश मिळेल.    येत्या २० एप्रिल रोजी चौदाव्या वर्षात पदार्पण करणारा अॅग्रोवन राज्यातील शेतकऱ्यांच्या सुखदुःखाचा सोबती बनला आहे. २००५ मध्ये सुरू झालेल्या ‘अॅग्रोवन‘ची भारतातील एकमेव कृषी दैनिक म्हणून ‘लिम्का बुक ऑफ रेकॉर्ड’ने नोंद घेतली आहे. गावशिवारातील शेतीच्या प्रयोगापासून ते जगभरातील शेती तंत्र, विज्ञान व संशोधनाची सखोल माहिती बांधावर पोचविणारा अॅग्रोवन शेतीबरोबरच सरपंच महापरिषदेसारख्या माध्यमातून ग्रामविकासाचाही दूत बनला आहे. वर्धापन दिनानिमित्त २० ते २२ एप्रिलदरम्यान तीन विशेषांकही प्रकाशित होत आहेत.