मागणीनंतर दोन दिवसांत टँकरचा प्रस्ताव पाठवा

सोलापूर : मागणी आल्यास ४८ तासांत टॅंकरबाबतचा प्रस्ताव पाठवावा, अशा सूचना पालकमंत्री विजयकुमार देशमुख यांनी मंगळवारी (ता. १३) दिल्या.

देशमुख यांच्या अध्यक्षतेखाली जिल्हा दुष्काळ निवारण समितीची बैठक झाली. जिल्हाधिकारी कार्यालयातील सेतू सभागृहात झालेल्या या बैठकीस जिल्हाधिकारी डॉ. राजेंद्र भोसले, जिल्हा परिषदेचे मुख्य कार्यकारी अधिकारी डॉ. राजेंद्र भारूड, अतिरिक्त जिल्हाधिकारी रामचंद्र शिंदे, अधीक्षक अभियंता धीरज साळे, निवासी उपजिल्हाधिकारी संजय तेली आदी उपस्थित होते.

देशमुख म्हणाले, ‘‘जिल्ह्यात केवळ ३८ टक्के पाऊस झाला आहे. दुष्काळच्या निवारणासाठी राज्य शासनाने आठ उपाययोजना निश्चित केल्या आहेत. या उपाययोजनांची प्रभावी अंमलबजावणी होईल, याकडे लक्ष द्यावे. जिल्ह्यातील विविध तालुक्यांतून आता पिण्याच्या पाण्यासाठी टँकरची मागणी होईल. अशा प्रकारची मागणी आल्यास त्याबाबतचा प्रस्ताव दोन दिवसांत पाठवला जावा. प्रत्यक्ष पाहणी केली जावी.’’

‘‘चारा पिकविण्यासाठी प्राधान्य दिले जावे. खासगी क्षेत्रातील आणि पशुसंवर्धन विभागाच्या वतीने पिकवल्या जाणाऱ्या चाऱ्याबाबतची माहिती संकलित केली जावी,’’ अशा सूचनाही पालकमंत्र्यांनी दिल्या.

जिल्हाधिकारी भोसले म्हणाले, ‘‘पुढील मेपर्यंत जिल्ह्यात सुमारे ५४० टँकर आणि २१७ चारा छावण्या सुरू कराव्या लागतील. शासनाने निश्र्चित केलेल्या आठ उपाययोजनांची काटेकोर अंमलबजावणी केली जाईल. सर्व संबंधित विभागानी याबाबत आवश्यक उपाययोजना कराव्यात.’’

बैठकीस उपजिल्हाधिकारी किशोर पवार, सचिन ढोले, मारुती बोरकर, प्रमोद गायकवाड, दीपक शिंदे, कृषी उपसंचालक रवींद्र माने, अग्रणी बँक व्यवस्थापक रामचंद्र चंदनशिवे, जिल्हा परिषदेचे शिक्षण विभागाचे भांजे, जीवन प्राधिकरणाचे चंदनशिवे आदी उपस्थित होते.