कृषी अधिकाऱ्यावर सहायकांचे गंभीर आरोप

नागपूर  : एटापल्ली (जि. गडचिरोली) येथील तालुका कृषी अधिकारी आपल्या अधिनस्त कर्मचाऱ्यांचा अमानवीय छळ करीत असल्याचा आरोप राज्य कृषी सहायक संघटनेने केला आहे. हा छळ न थांबल्यास तीव्र आंदोलन छेडण्याचा इशारा विभागीय कृषी सहसंचालकांना दिलेल्या निवेदनातून देण्यात आला आहे.

संघटनेच्या निवेदनानुसार, तालुका कृषी अधिकारी अधिनस्त कर्मचाऱ्यांचे वेतन वेळेवर काढत नाहीत. काही कृषी सहायकांचे वेतन त्यांनी हेतुपुरस्सपणे पाच ते सहा महिन्यांपासून प्रलंबित ठेवले आहे. प्रामाणिकपणे काम करणाऱ्यांकडून त्यांचे निहीत स्वार्थ पूर्ण होत नसल्याने हा विरोध केला जात आहे. थकीत वेतनाविषयी विचारणा केल्यानंतर त्यांना १-४ प्रपत्र भरून निलंबीत करण्याची धमकी दिली जाते.

या संदर्भात वाच्यता केल्यास पाहून घेईल, अशी दमदाटी करून अपमानास्पद वागणूक देतात. भीतीपोटी त्यांच्याकडून होणारा हा सारा छळ कर्मचारी सहन करतात. परंतु, सततच्या या वागणुकीमुळे कर्मचाऱ्यांचे मानसिक आणि शारीरिक स्वास्थ धोक्‍यात आले आहे. तालुका कृषी अधिकारी यांच्याकडून जीवितास धोका निर्माण झाल्याचा आरोपही निवेदनातून करण्यात आला आहे.

आपल्या स्वार्थाकरिता ते मर्जीतील कृषी सहायकाला मृद व जलसंधारण कामासाठी प्रतिनियुक्‍ती देतात मात्र अधिनस्त कृषी सहायक कामे सांभाळण्यास समर्थ असताना त्याचे मत जाणून न घेता फक्‍त मृद व जलसंधारण कामाकरिता प्रतिनियुक्‍त करतात. याला त्या गावातील कृषी सहायकाने विरोध केल्यास निलंबनाची धमकी देत असल्याचाही आरोप आहे.

एटापल्ली हा दुर्गम आणि नक्षलप्रवण भाग आहे. या भागात कृषी विस्ताराचे काम कृषी सहायकांकडून होत असताना कृषी अधिकारी मुस्कुटदाबी करीत असल्याचे कृषी सहायकांचे म्हणणे आहे. यासोबतच अनेक गंभीर आरोप निवेदनात करण्यात आले असून, याप्रकरणी तालुका कृषी अधिकारी यांच्यावर कारवाई न झाल्यास तीव्र आंदोलनाचा इशारा देण्यात आला आहे.