कर्जमाफीच्या नवव्या ग्रीन लिस्टमध्ये सात हजार शेतकरी

परभणीः छत्रपती शिवाजी महाराज शेतकरी सन्मान योजनेअंतर्गत कर्जमाफीसाठी अर्ज केलेल्या शेतकऱ्यांची नववी ग्रीन लिस्ट प्राप्त झाली आहे. या ग्रीन लिस्टनुसार ६ हजार ९९८ शेतकऱ्यांच्या खात्यावर जमा करण्यासाठी ५५ कोटी ६० लाख २७ हजार ४६५ रुपये एवढी रक्कम प्राप्त झाली. लवकरच ही रक्कम संबंधित शेतकऱ्यांच्या खात्यावर जमा करण्यात येणार आहे.

आजवर प्राप्त १ ते ७ आणि नवव्या ग्रीन लिस्टनुसार जिल्ह्यातील १ लाख ४१ हजार ५४३ शेतकऱ्यांना ८०० कोटी ७७ लाख ३४ हजार ३९५ रुपयांची कर्जमाफी मिळाली असल्याचे सूत्रांनी सांगितले. कर्जमाफी योजनेअंतर्गत या आधी प्राप्त झालेल्या १ ते ७ ग्रीन लिस्टनुसार जिल्ह्यातील १ लाख ३४ हजार ५४५ शेतकऱ्यांच्या खात्यावर ७४५ कोटी १७ लाख ६ हजार ९३० रुपये एवढी रक्कम जमा करण्यात आली आहे. बुधवारी (ता. २६) नववी ग्रीन लिस्ट प्राप्त झाली आहे. त्यानुसार ६ हजार ९९८ शेतकऱ्यांच्या खात्यावर ५५ कोटी ६० लाख २७ हजार ४६५ रुपये एवढी रक्कम प्राप्त झाली आहे.

नवव्या ग्रीन लिस्टमधील सर्व शेतकरी राष्ट्रीयीकृत बॅंकांचे कर्ज खातेदार आहेत. यामध्ये भारतीय स्टेट बॅंकेच्या ५ हजार ७८३ शेतकऱ्यांच्या खात्यावर ४९ कोटी २४ लाख २९ हजार ९९३ रुपये, अलाहाबाद बॅंकेचे २१६ शेतकऱ्यांच्या खात्यावर १ कोटी २२ लाख ८९ हजार ३९० रुपये, बॅंक आॅफ बडोदाच्या ६९ शेतकऱ्यांच्या खात्यावर ८२ लाख ६ हजार रुपये, बॅंक आॅफ महाराष्ट्राच्या ९१९ शेतकऱ्यांच्या खात्यावर ४ कोटी ९३ लाख ४० हजार ५६२ रुपये, कॅनरा बॅंकेच्या १० शेतकऱ्यांच्या खात्यावर १० लाख ५६ हजार ७७२ रुपये, विजया बॅंकेच्या एका शेतकऱ्याच्या खात्यावर ८४ हजार ७४८ रुपये जमा करण्यात येतील. अद्याप आठवी ग्रीन लिस्ट मात्र प्राप्त झालेली नाही. आजवर प्राप्त झालेल्या १ ते ७ आणि ९ व्या ग्रीन लिस्टनुसार जिल्ह्यातील १ लाख ४१ हजार ५४३ शेतकऱ्यांना ८०० कोटी ७७ लाख ३४ हजार ३९५ रुपये एवढी कर्जमाफी मिळाली आहे, असे सूत्रांनी सांगितले.