गूळ उद्योजकांना एकत्र करण्यासाठी शाहू संघाचा पुढाकार

कोल्हापूर : राज्यातील गूळ उद्योजकांना एकत्र करून गूळ उद्योगातील समस्या सोडविण्यासाठी येथील श्री छत्रपती शाहू सहकारी गूळ खरेदी विक्री संघाने पुढाकार घेतला आहे. विविध समस्या सोडविण्यासाठी एकत्रित ताकद उभी राहावी, यासाठी गूळ उद्योगातील व्यावसायिक, गूळ उत्पादक यांनी संस्थेकडे नोंदणी करण्याचे आवाहन संघाचे अध्यक्ष राजाराम पाटील यांनी केले आहे.

स्वातंत्र्यापूर्वीपासून ग्रामीण अर्थव्यवस्थेत महत्त्वाची भूमिका बजावणारा उद्योग दुर्लक्षित राहिला आहे. संशोधनाचा अभाव, एकी व दराची अनिश्‍चितता अशा स्थितीमुळे हा उद्योग संकटात आला आहे. या उद्योगासाठी केंद्र व राज्य सरकारच्या अन्न प्रक्रिया विभागाच्या अनेक योजना आहेत; पण उद्योजक एकत्र नसल्याने याचा कोणताही फायदा कोणत्याच घटकाला होत नसल्याचे दुर्दैवी चित्र आहे. पारंपरिक जोखडात अडकलेल्या गूळ

उद्योजकाला एकत्रित झाल्याशिवाय कोणत्याही योजनेचा लाभ मिळणे अशक्‍य आहे. यासाठीच आमची संस्था या उद्योगातील विविध घटकांचे एकत्रीकरण करत आहे. सध्या गुऱ्हाळ चालविणारे, गुऱ्हाळ सुरू करण्यास इच्छुक शेतकरी, विविध कारणांनी गुऱ्हाळे बंद केलेले उद्योजक आदीसह गूळ निर्मिती व विक्रीच्या क्षेत्रात जे जे घटक आहेत. त्या सर्वांना एकत्र करून गूळ उद्योजकाला चांगले दिवस आणण्यासाठी संस्था या सर्वांची माहिती एकत्रित करीत आहे. राज्यातील उद्योजकांनी संस्थेकडे आपली नोंदणी करावी, असे आवाहन श्री. पाटील यांनी केले.