देशाला पर्याय देण्याची स्थिती असेल, तर पाठिंबा : पवार

कोल्हापूर : व्यक्तिगत सलोखा व राजकीय संबंध यात फरक आहे. माझी राजकीय भूमिका स्वच्छ आहे. महाराष्ट्राच्या आणि भारताच्या हिताचा विचार करणारे लोक एकत्र येत असतील आणि त्यांच्या माध्यमातून राज्याला तसेच देशाला पर्याय देण्याची स्थिती असेल तर या गोष्टींना माझ्यासारख्याचा मनापासून पाठिंबा असेल, अशी भूमिका राष्ट्रवादी काँग्रेसचे अध्यक्ष व माजी केंद्रीय मंत्री शरद पवार यांनी शनिवारी (ता.१०) येथे स्पष्ट केली.  माजी खासदार कै. सदाशिवराव मंडलिक स्मृती पुरस्कार वितरण कार्यक्रमात बोलताना पवार म्हणाले, ‘‘माझ्या मनात काय हे माझ्या पक्षातल्या सगळ्या लोकांना कळते, मी वेगवेगळ्या पक्षांच्या लोकांशी मैत्री करतो, मैत्रीचे संबंध ठेवतो. शिवसेनेचे कै. बाळासाहेब ठाकरे माझे जवळचे मित्र. पण ठाकरेंच्या उमेदवाराला मी कधीही पाठिंबा दिला नाही आणि त्यांनीही कधी आमच्या उमेदवाराला पाठिंबा दिला नाही. आमची राजकीय ‘लाइन’ ठरलेली असते.’’ आजचे चित्र बघितल्यानंतर देशाच्या पातळीवर ज्या परिवर्तनाची आवश्‍यकता आहे, त्यात जे जे सहभागी होतील, त्यांच्यासोबत जाण्याची भूमिका आपली असेल, असेही पवार यांनी नमूद केले.