बौंडअळी, कापूस बियाणे, कर्जमाफीप्रश्‍नी शेतकरी संघटनेचे निवेदन

जळगाव : गुलाबी बोंड अळीग्रस्त शेतकऱ्यांना तातडीने मदतनिधी मिळावा, कापूस बियाणे लवकरात लवकर विक्री सुरू करावी, अशी मागणी शरद जोशीप्रणीत शेतकरी संघटनेतर्फे पारोळा (जि. जळगाव) येथे तहसीलदार यांच्याकडे करण्यात आली.  कापूस बियाण्यासंबंधी शेतकरी संभ्रमात आहेत. खानदेशात कापूस लागवड थांबली आहे. शेतकऱ्यांचे मागील हंगामात गुलाबी बोंड अळीने कोट्यवधींचे नुकसान झाले. परंतु शेतकऱ्यांना मदतनिधी मिळालेला नाही. शासनाने जी मदत पूर्वी जाहीर केली होती. त्यानुसार कार्यवाही व्हावी. हेक्‍टरी ३८ हजार व हेक्‍टरी ३० हजार रुपये मदतनिधी देण्याचे सरकारने म्हटले होते. कापूस उत्पादकांना न्याय मिळत नसल्याने ते अडचणीत आहेत, असेही निवेदनात म्हटले आहे. खरिपात कापूस लागवडीबाबत योग्य ते मार्गदर्शन कृषी विभागाने करायला हवे. तालुका कृषी अधिकारी शीतल कवर यांनाही मागण्यांचे निवेदन देण्यात आले. कृषी अधिकारी यांनी योग्य ती कार्यवाही करण्याचे आश्‍वासन दिले. निवेदन देताना संघटनेचे तालुकाध्यक्ष किशोर पाटील, जितेंद्र पाटील, मल्हार कुंभार, अमोल पाटील, भूषण पाटील, प्रवीण पाटील, वेदांत पाटील, शिरीष पाटील, पांडुरंग पाटील, सोनुसिंग पाटील, दीपक पाटील, गणेश पाटील आदी उपस्थित होते.