‘एफआरपी'साठी शेतकरी संघटना पुन्हा आंदोलनाच्या पवित्र्यात

सोलापूर: सोलापूर जिल्ह्यातील शेतकऱ्यांनी यंदाच्या हंगामात गाळपास दिलेल्या उसाला तत्काळ `एफआरपी' द्यावी आणि एफआरपी न देणाऱ्या कारखान्यांवर कारवाई करावी, या मागणीसाठी जिल्ह्यातील शेतकरी संघटना पुन्हा एकदा आक्रमक होणार आहेत. जूनच्या पहिल्या आठवड्यापासून `एफआरपी'साठी आंदोलन करण्याचा इशारा जिल्ह्यातील विविध शेतकरी संघटनांनी दिला आहे.  यंदा कमी पाऊसमानामुळे जेमतेम ऊस कारखान्याला गेला. पण त्याचे पैसे अद्यापही शेतकऱ्यांना मिळाले नाहीत. नऊ साखर कारखान्यांनी एफआरपीचे पैसे थकवले आहेत. त्यांच्यावर कारवाईही सुरू आहे, पण ही कारवाई ठोस नाही. या वर्षी दुष्काळामुळे आता येत्या गळीत हंगामातही तुलनेने कमीच ऊस पुरवठा होणार आहे. त्यामुळे पुढे मोठे संकट उभे राहिले असताना, आता यंदाचेच पैसे मिळाले नाहीत. पुढच्या हंगामाचे काय? असा प्रश्‍न शेतकऱ्यांना पडला आहे. प्रशासनाकडील १ मेच्या अहवालानुसार जिल्ह्यातील साखर कारखान्यांकडे शेतकऱ्यांचे जवळपास ९९६ कोटी रुपये थकीत आहेत. ही रक्कम मेअखेरपर्यंत मिळावी, अन्यथा रस्त्यावर उतरून आंदोलन करण्याचा इशारा देण्यात आला आहे.  याबाबत स्वाभिमानी शेतकरी संघटनेचे संघटक विजय रणदिवे यांनी सांगितले की, `एफआरपी' साठी कारवाई करताना सरकारने पक्षीय भेदभाव केला आहे. कारखानदारांकडील थकीत रक्कम शेतकऱ्यांना मिळावी, यासाठी भेदभाव करू नये. शेतकऱ्यांना त्यांच्या घामाचा पैसा मिळावा, अन्यथा मेअखेर किंवा जूनच्या पहिल्या आठवड्यात एफआरपीसाठी आंदोलन केले जाईल.'' ळिराजा शेतकरी संघटनेचे संजय घाटणेकर यांनीही साखर आयुक्त आणि जिल्हाधिकाऱ्यांनी `एफआरपी'साठी अनेक आदेश काढले आहेत. पण कारवाई होत नाही, त्यामुळे आंदोलनाशिवाय पर्याय नाही, असे सांगितले. रयतक्रांती शेतकरी संघटनेचे कार्याध्यक्ष दीपक भोसले यांनी मात्र "एफआरपची रक्कम मिळण्यासाठी राज्यमंत्री सदाभाऊ खोत यांच्या नेतृत्वाखाली आम्ही मुख्यमंत्री देवेंद्र फडणवीस यांना भेटणार आहोत. या भेटीतून `एफआरपी'चा प्रश्‍न सुटेल, अशी आशा आहे. तरीदेखील हा प्रश्‍न न सुटल्यास मेअखेर `एफआरपी'ची रक्कम न मिळाल्यास जूनपासून शेतकऱ्यांसाठी आम्ही रस्त्यावर उतरणार आहोत.