दूध दरवाढ द्यावी, अन्यथा राज्यव्यापी आंदोलनाचा शेतकरी संघटनेचा इशारा

पंढरपूर, जि. सोलापूर  ः सरकारने अनेक वेळा आश्‍वासन देऊनही शेतकऱ्यांना दूध दरवाढ मिळाली नाही. त्यामुळे सरकार व दुग्ध विकासमंत्र्यांकडून दूध उत्पादक शेतकऱ्यांचा विश्‍वासघात झाला आहे. एक जानेवारीपासून शेतकऱ्यांना दूध दरवाढ द्यावी, अन्यथा सरकारच्या विरोधात सुकाणू समितीच्या माध्यमातून राज्यव्यापी आंदोलन केले जाईल, असा इशारा बळिराजा शेतकरी संघटनेचे प्रदेशाध्यक्ष संजय पाटील घाटणेकर यांनी शनिवारी (ता. ३०) दिला. गाईच्या दुधाला तीस रुपये व म्हशीच्या दुधाला ५० रुपये प्रती लिटर दर मिळावा, या प्रमुख मागणीसाठी बळिराजा शेतकरी संघटनेच्या वतीने पिलीव (ता. माळशिरस) येथे शनिवारी रास्ता रोको आंदोलन केले. आंदोलनादरम्यान श्री. घाटणेकर यांनी राज्य सरकारच्या दूध धोरणावर टीकास्त्र सोडले. यावेळी श्री. घाटणेकर म्हणाले, शेतीमालाला हमीभाव नाही, उसाला कारखाने योग्य दर देत नाहीत, म्हणून शेतकरी दूध उत्पादनाकडे वळले आहेत. आता दुधालाही दर मिळत नसल्याने दूध व्यवसाय अडचणीत आला आहे. दुधाला दरवाढ मिळावी यासाठी लवकरच राज्यव्यापी आंदोलन केले जाईल. यावेळी माऊली हळणवर, प्रा. जयंत बगाडे, अजित बोरकर, माऊली जवळेकर, रमेश पाटील आदींची भाषणे झाली. या वेळी शहाजहान शेख, माळशिरस अजित बोरकर, धनंजय मदने आदीं उपस्थित होते.  आंदोलनादरम्यान दोन्ही बाजूने वाहनांच्या लांब रांगा लागल्या होत्या. स्थानिक पोलिस व महसूल विभागाच्या अधिकाऱ्यांनी निवेदन स्वीकारल्यानंतर आंदोलन मागे घेण्यात आले.