विषबाधितांच्या कुटुंबीयांचे शिवसेना करणार पुनर्वसन

यवतमाळ : फवारणीदरम्यान विषबाधा झालेल्या कुटुंबीयांच्या पुनर्वसनासाठी शिवसेना कटिबद्ध अाहे. या मोहिमेत समाजातील प्रत्येक घटकानेदेखील सहभागी व्हावे, असे आवाहन शिवसेना नेते व परिवहनमंत्री दिवाकर रावते यांनी केले.  येथील उत्सव मंगल कार्यालयात रविवारी (ता.२२) फवारणीमुळे मृत्युमुखी पडलेल्या व बाधितांच्या कुटुंबीयांसाठी भाऊबीज कार्यक्रमाचे आयोजन केले होते. या वेळी दिवाकर रावते बोलत होते. या वेळी महसूल राज्यमंत्री संजय राठोड, वसंतराव नाईक शेती स्वावलंबन मिशनचे अध्यक्ष किशोर तिवारी, शिवसेना जिल्हाप्रमुख विश्‍वास नांदेकर, संतोष ढवळे, वाशिमचे जिल्हाप्रमुख राजेश पाटील, सोमेश्‍वर पुसदकर, जिल्हा परिषद सदस्य श्रीधर मोहोड, माजी आमदार बाळासाहेब मुगनगीवार, नगराध्यक्ष कांचन चौधरी, लता चंदेल अादी उपस्थित होते. फवारणीमुळे मृत्यू झालेल्या २२ शेतकऱ्यांच्या कुटुंबीयांना या वेळी दहा हजार रुपयांची आर्थिक मदत देण्यात आली. शेतकऱ्यांची पत्नी, आई यांना साडीचोळी, मुला-मुलींना कपडे, दप्तर, वह्या आणि आवश्‍यक शालेय वस्तूंचे किट भेट देण्यात आले. 

 कुटुंबीयांना देणार रोजगाराचे साधन भाऊबीज कार्यक्रमात शिवसेनेच्या वतीने विषबाधेमुळे मृत्यू झालेल्या कुटुंबीयांकडून एक फॉर्म भरून घेण्यात आला. त्यात त्यांना कोणत्या प्रकारची मदत हवी आहे, याविषयी विचारणा करण्यात आली. त्यात काही कुटुंबीयांनी रोजगाराकरिता पीठगिरणी, तर काहींनी दूध व्यवसायाकरिता दुधाळ जनावरांची गरज असल्याचे लिहून दिले. त्याप्रमाणे या कुटुंबीयांना लवकरच शिवसेना रोजगाराकरिता त्यांच्या इच्छेप्रमाणे मदत करणार असल्याचे महसूल राज्यमंत्री संजय राठोड यांनी सांगितले.