छावण्यांच्या मंजुरीसाठी शिवसेनेचा ठिय्या

नगर : जिल्ह्यात पशुधनाला दिलासा देण्यासाठी छावण्यांना तत्काळ मंजुरी द्यावी, या मागणीसाठी शिवसेनेतर्फे गुरुवारी (ता. २१) निवासी उपजिल्हाधिकारी कार्यालयात ठिय्या आंदोलन सुरू करण्यात आले. छावण्यांना मंजुरी मिळत नाही, तोपर्यंत आंदोलन सुरूच ठेवणार असल्याचा निर्धार पक्षाच्या वतीने करण्यात आला आहे. 

माजी खासदार दादा पाटील शेळके, शिवसेनेचे उपनेते अनिल राठोड, शशिकांत गाडे यांच्या नेतृत्वाखाली आंदोलन सुरू करण्यात आले. शिवसेनेचे संदेश कार्ले, शरद झोडगे, रामदास भोर, प्रवीण कोकाटे, संदीप गुंड, दिलीप सातपुते, संभाजी कदम, राजेंद्र भगत, भाऊ ताकपिरे, दीपक कार्ले, गोविंद मोकाटे, तसेच काॅँग्रेसचे बाळासाहेब हराळ, राष्ट्रवादीचे प्राजक्त तनपुरे, प्रताप ढाकणे आदी या वेळी उपस्थित होते. जिल्ह्यात दुष्काळाचे सावट आहे. पशुधनाचा पाण्याचा, तसेच चाऱ्याचा प्रश्‍न दिवसेंदिवस गंभीर होत आहे. जिल्ह्यात लवकरात लवकर छावण्या सुरू कराव्यात, जाचक अटी शिथिल कराव्यात, मोठ्या जनावरांसाठी शंभर, तर लहान जनावरांसाठी पन्नास रुपये दर निश्‍चित करण्यात यावेत, तत्काळ छावण्यांना मंजुरी द्यावी आदी मागण्या करण्यात आल्या आहेत. नगर तालुक्‍यातील अनेक प्रस्ताव प्रलंबित आहेत; परंतु सध्या एकाही छावणीला तेथे मंजुरी नाही. 

नगर तालुक्‍यात या वर्षी अत्यंत कमी पाऊस झाला असून, खरीप व रब्बीची पिके शेतकऱ्यांच्या हातातून गेली आहेत. पाण्याचे स्रोत संपले असून, शेतकऱ्यांपुढे पिण्याच्या पाण्याचा व चाऱ्याचा गंभीर प्रश्‍न निर्माण झाला आहे. पालकमंत्री, सत्ताधारी आमदारांची शिफारस कशाला? जिल्ह्यातील पशुधनाला जगविण्याचे काम प्रशासनाने पार पाडावे. जिल्हा प्रशासन पालकमंत्री राम शिंदे, सत्ताधारी आमदार यांच्या दबावाखाली काम करत असल्याचा आरोप शिवसेनेतर्फे करण्यात आला आहे.

दुष्काळाच्या पार्श्‍वभूमीवर काही कार्यकर्त्यांनी, सरकारी निर्णय होण्यापूर्वी पशुधन वाचविण्याच्या निर्मळ भावनेतून स्वयंस्फूर्तीने चाराछावण्या सुरू केल्या. त्यासाठी काही जणांनी मोठी जोखीम उचलली. लोकसहभागातून सुरू झालेल्या छावण्यांना मंजुरी देणे अपेक्षित होते. मात्र, तसे न करता राजकीय दबावातून डावलले जात आहे. - संदेश कार्ले, जिल्हा परिषद सदस्य