मानोरा येथील खरेदी केंद्रावर हरभरा भिजला

वाशीम ः जिल्ह्यातील मानोरा खरेदी केंद्रावर पावसामुळे विक्रीसाठी अालेल्या हरभऱ्याची पोती अोले झाल्याचा प्रकार समोर अाला अाहे. सुमारे सातशे क्विंटल हरभरा या केंद्रावर सध्या पडून अाहे.

या हंगामात मानोरा तालुक्यात गेल्या तीन दिवसांत चांगला पाऊस झाला. या पावसामुळे जनजीवन विस्कळित झाले. हमीभाव खरेदी केंद्रावर विक्रीसाठी अालेल्या हरभऱ्याची काही पोती अोली झाल्याचे दिसून अाले. २९ मेपासून नाफेडची हरभरा खरेदी बंद झालेली असल्याने या केंद्रावर हरभरा पडून होता. पावसापासून बचाव करण्यासाठी शेतकऱ्यांनी त्यावर ताडपत्री टाकली. मात्र ही पोती उघड्यावर असल्याने पाण्यापासून पूर्ण बचाव झाला नाही. पोती अोली झाल्याने काही ठिकाणी कोंबसुद्धा फुटल्याचे बोलले जाते.

शेतकऱ्यांनी ट्रॅक्टर, छोट्या वाहनांतून हरभरा विक्रीसाठी अाणलेला अाहे. वाहने उभी असल्याने त्याचे भाडे दररोज वाढत अाहे. हरभरा खरेदीला मुदतवाढ मिळाली होती, परंतु बारदाना नसल्याने या केंद्रावर खरेदी झाली नाही. शेतकऱ्यांना मेेसेज पाठवलेले नसतानाही त्यांनी हरभरा विक्रीसाठी अाणला अाहे, असे खरेदी विक्री संघाने तहसीलदारांना कळविले. एकीकडे मोजमाप होत नसताना दुसरीकडे पावसापासून माल वाचवण्याची व्यवस्था या ठिकाणी नसल्याने शेतकऱ्यांमध्ये रोष वाढत अाहे.