‘एमएसपी’ साखरेलाही पाहिजे ः दिलीपराव देशमुख

लातूर ः उसाला, दुधाला, शेतमालाला हमी भाव मिळावा म्हणून आंदोलन केली जात आहेत. ऊस जर शेतकऱ्याचे पीक असेल तर साखरदेखील त्यांचेच उत्पादन समजले पाहिजे. त्यातून साखरेलादेखील एमएसपी लागू केली गेली तरच शेतकऱ्यांच्या उसाला उच्चांकी दर देता येईल, असे मत माजीमंत्री दिलीपराव देशमुख यांनी येथे व्यक्त केले.

लातूर जिल्ह्यात मांजरा साखर परिवाराच्या वतीने उसाला उच्चांकी दर देण्यात आला आहे. त्यामुळे विविध संघटनांच्या वतीने मंगळवारी (ता. १८) त्यांचा जाहीर सत्कार करण्यात आला. या कार्यक्रमाचे संयोजक शिवसेनेचे सहसंपर्क प्रमुख अभय साळुंके, महाराष्ट्र नवनिर्माण सेनेचे जिल्हाध्यक्ष संतोष नागरगोजे, स्वाभिमानी शेतकरी संघटनेचे प्रवक्ते सत्तार पटेल, शेतकरी संघटनेचे राजेंद्र मोरे, रयत शेतकरी संघटनेचे पेठे हे होते. अध्यक्षस्थानी देवणीचे मल्लिकार्जून मानकरी हे होते. उसाला उच्चांकी भाव दिल्याबद्दल पहिल्यांदाच असा प्रकारचा सत्कार येथे झाला.

राज्यात कृषी विभागाला स्वतंत्र मंत्री नाही हे दुर्दैव आहे. सरकारला गायीची काळजी आहे. पण गायी सांभाळणाऱ्या शेतकऱ्याला मात्र वाऱ्यावर सोडले जात आहे, अशी टीका श्री. देशमुख यांनी या वेळी केली.

लातूर जिल्ह्यात कारखाने बुडवणारे नेते झाले आहेत. पण राज्याने आदर्श घ्यावा, अशी कारखानदारी मांजरा परिवाराची आहे. हे केवळ श्री. देशमुख यांच्यामुळे घडले आहे, असे श्री. साळुंके म्हणाले. या वेळी श्री. नागरगोजे, श्री. मानकरी, श्री. मोरे, श्री. पटेल यांची भाषणे झाली. या वेळी शेतकरी मोठ्या संख्येने उपस्थित होते.