श्री क्षेत्र माळेगाव खंडेरायाच्या यात्रेस प्रारंभ

माळकोळी, जि. नांदेड ः बेल-फूल भंडाऱ्याची उधळण... आणि येळकोट... येळकोट जय मल्हारचा गजर. भंडाऱ्यात रंगलेले, खंडरायाच्या भक्तीत दंगलेले भाविक... अशा भक्तिमय वातावरणात श्री क्षेत्र माळेगाव येथील श्री खंडेरायाच्या यात्रेला शनिवारी (ता. १६) प्रारंभ झाला. दक्षिण भारतातील सर्वांत मोठी आणि अनेक समाज घटाकांसाठी जिव्हाळ्याची म्हणून माळेगावच्या यात्रेस प्रसिद्धी आहे. हजारो भक्तांच्या साक्षीने श्री खंडोबाच्या देवस्वारीने यात्रेची सुरवात झाली.  श्री खंडोबा देवस्थानातून परंपरेनुसार देवांची पालखी काढण्यात आली. पालखीच्या पुढे परंपरेनुसार रिसनगावचे मानकरी गणपतराव मल्हारराव नाईक यांची पालखी होती. वाजत-गाजत आणि पारंपरिक वाद्यांच्या गजरात पालख्या मार्गस्थ झाल्या. त्याबरोबर बेल-फूल भंडार, खोबऱ्यांची उधळण सुरू झाली. भंडाऱ्याच्या उधळणीने आणि तोंडी खंडोबारायाच्या जयघोषणाने वातावरण भक्तिमय होऊन गेले. देवस्वारी आणि पालखीची नगर प्रदक्षिणा मुख्य रस्त्यावरील शासकीय विश्रामगृहासमोर आली. या वेळी नांदेड जिल्हा परिषदेच्या वतीने पारंपरिक पद्धतीने मानकऱ्यांचा स्वागत-सत्कार करण्यात आला. देवाच्या पालखीचे पूजन करण्यात आले. या वेळी जिल्हा परिषद अध्यक्षा श्रीमती शांताबाई पवार, खासदार डॉ. सुनील गायकवाड, आमदार प्रतापराव पाटील चिखलीकर, जिल्हा परिषद उपाध्यक्ष तथा अर्थ व बांधकाम सभापती समाधान जाधव, शिक्षण व आरोग्य समिती सभापती माधवराव मिसाळे, कृषी व पशुसंवर्धन सभापती दत्तात्रय रेड्डी, महिला व बालकल्याण सभापती सौ. मधुमती देशमुख, समाज कल्याण सभापती शीलाताई निखाते, लोहा पंचायत समिती सभापती सतीश पाटील उमरेकर, माजी आमदार माधवराव पाटील, हरिहरराव भोसीकर, जिल्हा परिषद सदस्य चंद्रसेन पाटील, माळेगावचे सरपंच गोविंद राठोड, उपसरपंच सुंदरबाई धुळगंडे यांची प्रमुख उपस्थिती होती.