गिरणारे बाजारातील बेहिशेबी वसुलीला चाप

नाशिक : गिरणारे (ता. जि. नाशिक) येथील टोमॅटो बाजारात व्यापाऱ्यांकडून परस्पर कुणीही पैशांची वसुली करू नये, असा ठराव बुधवारी (ता. १०) झालेल्या विशेष ग्रामसभेत घेण्यात आला. रामचंद्र देवस्थान ट्रस्टने या वसुलीबाबत दिलेल्या लिलावास ग्रामस्थांकडून कडाडून विरोध करण्यात आला. याबाबत सर्वसंमतीने ठराव संमत झाला. या निर्णयामुळे लाखो रुपयांच्या बेहिशेबी वसुलीला चाप बसणार आहे.

गिरणारे परिसरातील हा बाजार पिंपळगाव बसवंत नंतर जिल्ह्यातील दुसऱ्या क्रमांकाचा सर्वात मोठा बाजार आहे. हंगामात या बाजारात सरासरी १ लाख क्रेटची टोमॅटाची आवक होते. अनेक व्यक्ती व संस्था व्यापाऱ्यांकडून परस्पर पैशाची वसुली करतात. यामुळे टोमॅटोच्या बाजारावर विपरीत परिणाम होतो. गिरणारे टोमॅटो मार्केटच्या हंगामाचा नुकताच प्रारंभ झाला असून या पार्श्‍वभूमीवर गिरणारेची ग्रामसभा बोलावण्यात आली होती. या वेळी ग्रामपंचायती व्यतिरिक्त अन्य कुणीही बाजार वसुली करू नये, अशी मागणीही ग्रामस्थांनी केली.

रामचंद्र देवस्थान ट्रस्टच्या संचालकांनी विश्‍वासात न घेता परस्पर बाजाराचा लिलाव जाहीर केला आहे. तो बेकायदेशीर असून त्याबाबत दाद मागण्यात येणार असल्याचे ग्रामपंचायतीच्या वतीने सांगण्यात आले. या वेळी ग्रामस्थांमधूनही त्यास विरोध करण्यात आला. या वेळी नाशिक तालुका शेतकी संघाचे माजी अध्यक्ष निवृत्ती घुले, संत निवृत्तीनाथ महाराज ट्रस्टचे विश्‍वस्त पुंडलिकराव थेटे, भिकाभाऊ थेटे, सखाराम थेटे, नितिन गायकर, महेंद्र थेटे, प्रवीण कोरडे, हिरामण गायकर, विजुनाना थेटे, हरिभाऊ गायकर, रोहन थेटे, विलास थेटे उपस्थित होते.

बाजारासाठी सुविधा पुरविणार

गिरणारे टोमॅटो बाजारात शेतकरी व व्यापाऱ्यांना रस्ते, वीज, पाणी या सुविधा पुरविण्यासाठी ग्रामपंचायतीकडून नियोजन करण्यात येणार आहे. हंगामातील वाहनांची गर्दी टाळण्यासाठी येण्या-जाण्याचे मार्ग निश्‍चित करण्यात येणार आहेत. बाजारातील गैरप्रकार रोखण्यासाठी पोलिस बंदोबस्तही मागविण्यात आला अाहे, असे सरपंच अलका दिवे व उपसरपंच तानाजी गायकर यांनी सांगितले.