‘सिद्धेश्‍वर'ची चिमणी अखेर पाडणार

सोलापूर : होटगी रस्त्यावरील विमानसेवेला अडथळा ठरणाऱ्या सिद्धेश्‍वर सहकारी साखर कारखान्याच्या चिमणीच्या संरक्षणाची याचिका न्यायालयाने फेटाळल्यानंतर आता जिल्हाधिकारी कार्यालयाकडून हालचाली सुरू करण्यात आल्या आहेत. सिद्धेश्‍वर कारखान्याची चिमणी हटविण्याबाबत कार्यवाही करण्याची सूचना जिल्हाधिकारी डॉ. राजेंद्र भोसले यांनी महापालिका आयुक्त अविनाश ढाकणे यांना केली आहे.

जिल्हाधिकाऱ्यांनी या चिमणीबाबत तत्काळ कार्यवाही करण्याचे पत्र दिले आहे. परंतु हे पत्र अद्यापपर्यंत मिळाले नसल्याची माहिती महापालिका प्रशासनाच्या वतीने देण्यात आली आहे. सिद्धेश्‍वर सहकारी साखर कारखान्याने नव्याने उभारलेल्या चिमणीमुळे होटगी रस्त्यावरील विमानतळावरून विमानसेवा सुरू करण्यात अडथळा येत असल्याबाबतचा अहवाल एअरपोर्ट ॲथॉरिटीकडून शासनाला देण्यात आला होता.

चिमणी हटविण्यासाठी महापालिकेने प्रक्रिया हाती घेतल्यानंतर सुरवातीला राज्य शासनाने तीन महिन्यांची मुदत दिली. त्यानंतर कारखान्यातील कामगार युनियन व शेतकऱ्यांनी उच्च न्यायालयात याचिका दाखल करून कारवाईला स्थगिती देण्याची मागणी केली होती. न्यायालयाने मागील महिन्यात स्थगितीबाबत याचिका फेटाळून लावत कारवाईला परवानगी दिली आहे.