सिद्धेश्‍वर यात्रेतील धार्मिक विधीस प्रारंभ

सोलापूर : शिवयोगी श्री सिद्धेश्‍वर यात्रेच्या धार्मिक विधींना बुधवारी (ता. 10) सुरवात झाली. सकाळी मानकरी मल्लिकार्जुन कुंभार यांच्या निवासस्थानी गणपतीचे व श्री सिद्धरामेश्‍वरांच्या प्रतिमेचे पूजन करून दिवे घालण्याचा कार्यक्रम झाला. त्यानंतर पूर्वापार चालत आलेल्या परंपरेप्रमाणे 56 नग मातीच्या घागरी यात्रेचे प्रमुख मानकरी श्री. हिरेहब्बू यांच्याकडे सुपूर्त करण्यात आल्या.

या वेळी प्रमुख मानकरी योगिराज म्हेत्रे, मल्लिकार्जुन म्हेत्रे, महादेव म्हेत्रे, रेवणसिद्ध म्हेत्रे, संगण्णा म्हेत्रे, नागनाथ कुंभार, सुरेश म्हेत्रे, माजी नगरसेवक भीमाशंकर म्हेत्रे यांच्यासह यात्रेतील प्रमुख मानकरी उपस्थित होते. परंपरेप्रमाणे शिवयोगी श्री सिद्धरामेश्‍वरांच्या हातातील योगदंड उत्तर कसबा येथील श्री शिवानंद हिरेहब्बू यांच्या वाड्यातून श्री मठपती (स्वामी) शुक्रवार पेठ येथील दिवंगत रामचंद्रप्पा शेटे यांच्या वाड्यात घेऊन जाण्याची परंपरा 900 वर्षांपासून आहे. त्यानुसार योगदंड बुधवारी शेटे वाड्यात नेण्यात आला. त्या ठिकाणी मानकरी हिरेहब्बू यांचे आगमन झाल्यानंतर योगदंडाची विधिवत पूजा व होमहवन करण्यात आला. त्यानंतर शेटे यांचे वारस ऍड. मिलिंद थोबडे यांनी हिरेबब्बू यांची पाद्यपूजा केली. सिद्धेश्‍वर यात्रेच्या प्रथेप्रमाणे योगदंड पूजनाने सिद्धेश्‍वर यात्रेच्या विधींची सुरवात होते.

आज तैलाभिषेक, कृषी प्रदर्शनाचेही उद्‌घाटन सिद्धेश्‍वर यात्रेतील मुख्य धार्मिक विधींना शुक्रवारी (ता.12) सुरवात होत आहे. सकाळी बाळीवेशीतून सिद्धेश्‍वरांच्या मानाच्या सातही नंदीध्वजांच्या मिरवणुकीने तैलाभिषेक विधी होईल. यात्रेच्या निमित्ताने कृषी प्रदर्शनाचेही आयोजन करण्यात आले आहे. या प्रदर्शनाचे उद्‌घाटनही शुक्रवारी मान्यवरांच्या हस्ते होईल. 12 ते 16 जानेवारी या कालावधीत होम मैदानावर हे प्रदर्शन होणार आहे. सुमारे 200 स्टॉल्स यामध्ये आहेत. शेतीतील विविध तंत्रज्ञानासह माहितीचे विविध स्टॉल्सचा यात समावेश आहे.