एसअायटी पथकाचा अकोला दौरा अाटोपला

एसअायटी पथकाचा अकोला दौरा अाटोपला
एसअायटी पथकाचा अकोला दौरा अाटोपला

अकोला ः शेतातील पिकांवर कीटकनाशकांची फवारणी करताना विषबाधा होऊन काही शेतकरी, शेतमजुरांचा मृत्यू झाल्याप्रकरणी विशेष तपासणी पथकाने (एसअायटी) शुक्रवारी (ता.३) सायंकाळी उशिरापर्यंत संबंधितांच्या भेटी घेतल्या. पथकाने अकोला येथील शासकीय सर्वोपचार रुग्णालयासह कीटकनाशक फवारणीमुळे विषबाधित झालेल्या शेतकऱ्यांशी संवाद साधला; तसेच तालुक्यातील अागर येथे एका शेतकरी कुटुंबाला भेटसुद्धा दिली. विभागीय अायुक्त पीयूष सिंह यांच्या नेतृत्वात विशेष पोलीस महानिरीक्षक सी. एच. वाकडे, आरोग्य सहसंचालक डॉ. नितीन नाईकवाडे, डॉ. पंजाबराव देशमुख कृषी विद्यापीठाचे कीटकशास्त्र विभागप्रमुख डॉ. डी. बी. उंदिरवाडे, नागपूरच्या केंद्रीय कापूस संशोधन संस्थेचे संचालक विजय वाघमारे, फरिदाबादच्या डायरेक्टोरेट ऑफ प्लान्ट प्रोटेक्शन, क्वारेनटाईन ॲन्ड स्टोरेजचे के. डब्ल्यू. देशकार, विभागीय कृषी सहसंचालक सुभाष नागरे यांचे पथक शुक्रवारी अकोला दौऱ्यावर होते.  पथकाने सुरवातीला जिल्हाधिकारी कार्यालयात यंत्रणांकडून अाढावा घेतला. त्यानंतर पथकातील सदस्यांनी शासकीय रुग्णालयात उपचार घेणाऱ्या शेतकऱ्यांची आस्थेवाईकपणे चौकशी केली; तसेच त्यांच्यावरील उपचारांबाबतची माहिती संबंधित डॉक्टरांकडून जाणून घेतली. या वेळी जिल्हाधिकारी आस्तिक कुमार पाण्डेय, मुख्य कार्यकारी अधिकारी एस. रामामूर्ती, पोलिस अधीक्षक एम. राकेश कलासागर, शासकीय वैद्यकीय महाविद्यालयाचे अधिष्ठाता डॉ. राजेश कार्यकर्ते, उपविभागीय अधिकारी प्रा. संजय खडसे, अधीक्षक कृषी अधिकारी राजेंद्र निकम, तहसीलदार राजेश्वर हांडे व अन्य आरोग्य अधिकारी उपस्थित होते. कीटकनाशक फवारणीमुळे विषबाधा होऊन मृत्यू झालेले अकोला तालुक्यातील आगर येथील शेतमजूर राजेश मनोहर फुकट यांच्या कुटुंबीयांची विशेष तपासणी भेट घेतली; तसेच विद्यापीठाच्या कापूस संशोधन केंद्राच्या प्रक्षेत्राला भेट देऊन माहिती घेतली. समितीचा हा दौरा पूर्ण झाला असून अाता अहवालाकडे जिल्ह्यातील शेतकऱ्यांचे लक्ष लागले अाहे.  

Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.

ताज्या कृषी घडामोडींसाठी फेसबुक, ट्विटर, इन्स्टाग्राम टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.

Related Stories

No stories found.
Agrowon
agrowon.esakal.com