गेल्या वर्षीच्या अवकाळीपोटी साठ लाखांची मदत जाहीर

मुंबई : गेल्या वर्षी मार्च महिन्यात राज्याच्या काही भागात झालेल्या अवकाळी पाऊस आणि गारपिटीतील नुकसानग्रस्तांना राज्य सरकारने मदत जाहीर केली आहे. एक हजार हेक्टरवरील नुकसानीपोटी सुमारे साठ लाख रुपये वितरित करण्याचे आदेश जारी करण्यात आले आहेत.  गेल्या वर्षी मार्च महिन्यात राज्याच्या काही जिल्ह्यांत अवकाळी पाऊस आणि गारपिटीने शेतीपिकांचे नुकसान झाले होते. सोलापूर, बीड, लातूर, उस्मानाबाद, अकोला, यवतमाळ आदी जिल्ह्यांत हे नुकसान झाले होते. या जिल्ह्यातील सुमारे एक हजार हेक्टरवरील क्षेत्राचे यात नुकसान झाले होते. बाधित शेतकऱ्यांना मदत देण्यासाठी आवश्यक असलेल्या निधीची मागणी सर्व विभागीय आयुक्तांकडून मागवण्यात आली होती. त्यांच्याकडून प्राप्त झालेल्या निधी मागणीच्या प्रस्तावानुसार हा निधी वितरीत करण्यात आला आहे. त्यानुसार सुमारे साठ लाख रुपये नुकसानभरपाई वितरित केली जाणार आहे.  महसूल व कृषी विभागाच्या क्षेत्रीय अधिकाऱ्यांकडून करण्यात आलेल्या संयुक्त पंचनाम्याच्या आधारे पिकांचे ३३ टक्के किंवा त्यापेक्षा जास्त नुकसान झालेल्या शेतकऱ्यांना ही मदत दिली जाणार आहे. मदतीची ही रक्कम संबंधित शेतकऱ्यांच्या बँक खात्यात थेट जमा करण्यात यावी, कोणत्याही शेतकऱ्यांना रोख अथवा निविष्ठा स्वरूपात मदत देण्यात येऊ नये, असे निर्देश देण्यात आले आहेत. तसेच थेट रक्कम जमा करताना मदतीच्या रकमेतून बँकांनी कोणत्याही प्रकारची वसुली करू नये अशा स्पष्ट सूचना देण्यात आल्या आहेत. मदत आणि पुनर्वसन विभागाने नुकताच यासंदर्भातील आदेश जारी केला आहे.