सोलापूर बाजार समिती : प्रारूप मतदार यादीवर २५ पर्यंत हरकती

सोलापूर : सोलापूर कृषी उत्पन्न बाजार समितीच्या सार्वत्रिक निवडणुकीसाठी जिल्हा निवडणूक कार्यालयाच्या वतीने सुधारित प्रारूप यादी जाहीर करण्यात आली. एक लाख १८ हजार ८३० मतदारांचा समावेश असलेल्या या यादीवर दावे व हरकती स्वीकारण्यास सुरवात झाली आहे. येत्या २५ एप्रिलपर्यंत यासंबंधीच्या हरकती स्वीकारल्या जाणार आहेत.  दाखल झालेल्या हरकतींवर २६ एप्रिल ते ७ मे या कालावधीत निर्णय घेतला जाणार आहे. त्यानंतर १४ मे रोजी सोलापूर बाजार समितीची अंतिम मतदार यादी प्रसिद्ध केली जाणार आहे. त्यासाठी ३१ डिसेंबर २०१७ ही अर्हता तारीख निश्‍चित करण्यात आली आहे. बाजार समितीसाठी पूर्वी सामाईक सातबारा उताऱ्यावर एकाच शेतकऱ्याला मतदानाचा अधिकार देण्याचा निर्णय झाला होता. या निर्णयाच्या विरोधात न्यायालयात याचिका दाखल झाल्यानंतर राज्य सहकारी निवडणूक प्राधिकरणाच्या वतीने या निकषात बदल केला.  सामाईक सातबारावरील सर्व व्यक्तींच्या नावे किमान १० गुंठे क्षेत्र असेल, तर सर्वांना मतदानाचा अधिकार देण्याचा निर्णय घेतला. या निर्णयानुसार आता सुधारित मतदार याद्या तयार करण्यात आल्या आहेत. या सुधारित निकषामुळे पूर्वी सोलापूर बाजार समितीची शेतकरी मतदार संख्या ८२ हजार ३८९ वरून एक लाख १६ हजार ५५६ एवढी झाली आहे. नव्याने तयार झालेल्या मतदार यादीत १ लाख १६ हजार ५५६ शेतकरी मतदार, २ हजार २७४ हमाल, तोलार मतदार यांचा समावेश आहे.  दरम्यान, बार्शी बाजार समितीच्या बाबतीतही न्यायालयाने आदेश दिला आहे. १५ मेपर्यंत मतदार यादी अंतिम केली जाणार आहे. बार्शी बाजार समितीसाठी शेतकऱ्यांची मतदार यादी तहसील कार्यालयाच्या वतीने बाजार समितीला देण्यात आली आहे.