सोलापूर, बार्शी बाजार समितीचा निवडणूक कार्यक्रम तयार

सोलापूर : सोलापूर आणि बार्शी कृषी उत्पन्न बाजार समितीच्या निवडणुकीची संपूर्ण तयारी प्रशासनाने केली असून, निवडणुकीचे संभाव्य वेळापत्रकही तयार झाले आहे. राज्य सहकारी निवडणूक प्राधिकरणाच्या मान्यतेसाठी हे वेळापत्रक आता पाठवण्यात आले आहे. त्यांच्या मान्यतेनंतर तातडीने निवडणूक लागण्याची शक्‍यता आहे. या निवडणूक कार्यक्रमानुसार २५ जून ही निवडणुकीची तारीख निश्‍चित करण्यात आली आहे. निवडणूक प्रशासनाने दोनच दिवसांपूर्वी मतदारांची अंतिम यादी प्रसिद्ध केली होती. त्यानंतर आता निवडणूक कार्यक्रमही तयार झाल्याने गेल्या अनेक दिवसांपासून सुरू असलेली निवडणुकीबाबतची उत्सुकता संपणार आहे. निवडणूक शाखेने पाठविलेल्या निवडणूक कार्यक्रमात २३ ते २८ मेदरम्यान उमेदवारांची अर्ज स्वीकृती, २९ मे रोजी छाननी, १२ जून रोजी उमेदवारी मागे घेण्याची मुदत, १३ मे रोजी निवडणूक चिन्हांचे वाटप प्रस्तावित करण्यात आले आहे. २५ जूनला मतदान तर २७ जून रोजी मतमोजणी प्रस्तावित करण्यात आली आहे. बार्शी व सोलापूर बाजार समितीसाठी उपजिल्हाधिकारी दर्जाच्या अधिकाऱ्यांची निवडणूक निर्णय अधिकारी म्हणून तर तहसीलदार अथवा सहायक निबंधक दर्जाच्या अधिकाऱ्यांची सहायक निवडणूक निर्णय अधिकारी म्हणून नियुक्ती करण्यास मान्यता मिळावी म्हणूनही प्रस्ताव पाठविण्यात आला आहे. या दोन्ही समित्यांसाठी प्रत्येकी एक निवडणूक निर्णय अधिकारी व दोन सहायक निवडणूक निर्णय अधिकारी नियुक्त केले जाणार आहेत. दरम्यान, बार्शी व सोलापूर बाजार समितीच्या निवडणुकीत ईव्हीएम वापरणार की मतपत्रिका याबाबत अद्याप निर्णय झालेला नाही, त्याबाबतही निर्णय अपेक्षित आहे.