दुधाला २७ रुपये दर मिळालाच पाहिजे

कुर्डू जि.सोलापूर : शेतकऱ्यांच्या दुधाला २७ रुपये दर दिलाच पाहिजे या व इतर विविध मागण्यांसाठी माढा तालुका काँग्रेस कमिटीच्या वतीने लऊळ (ता. माढा) येथे बुधवारी (ता. १६) सकाळी शासनाच्या निषेधार्थ रास्ता रोको आंदोलन करण्यात आले. या वेळी रस्त्यावर दूध ओतून शासनाचा निषेध करण्यात आला.  या वेळी काँग्रेसचे जिल्हाध्यक्ष प्रकाश पाटील, जिल्हा उपाध्यक्ष संदीप साठे, तालुकाध्यक्ष सौदागर जाधव, अल्पसंख्याक अध्यक्ष रफिक शेख, युवा तालुकाध्यक्ष धनंजय मोरे, जिल्हा सरचिटणीस रामभाऊ वाघमारे, विशाल नलवडे, कुर्डुवाडी शहराध्यक्ष हमीद शिकलकर, सुरेश लोंढे, भूमाता शेतकरी संघटनेचे महाराष्ट्र अध्यक्ष मारुती जगदाळे, बालाजी सावंत, अप्पासाहेब सुर्वे, भारत चव्हाण, श्रावण जाधव, युवक आघाडीचे जिल्हा उपाध्यक्ष संजय पाटील, जाहीर मणेर, शाहुराजे जगताप, माजी शहराध्यक्ष संजय त्रिंबके आदी मान्यवर उपस्थित होते.  शेतकऱ्यांना शासन नियमाप्रमाणे प्रति लिटर २७ रुपये दूध दर मिळाल्याशिवाय शांत बसणार नाही, असे जिल्हाध्यक्ष प्रकाश पाटील यांनी सांगितले. त्यांनी सरकारच्या धोरणावर टीकेची झोड उठवली. या वेळी संदीप साठे, धनंजय मोरे, सौदागर जाधव यांनी मनोगत व्यक्त केले. सुमारे ४५ मिनिटे रस्ता अडवला होता. त्यामुळे अधिक मास सुरू झाला असल्याने पंढरपूरकडे जाणाऱ्या वाहनांची मोठी रांग लागली होती. या ‘रास्ता रोको’साठी परिसरातील व तालुक्‍यातील शेतकऱ्यांनी मोठ्या प्रमाणात गर्दी केली होती.