सोलापुरात मेथी, शेपू, कोथिंबिरीचे दर टिकून

सोलापूर ः सोलापूर कृषी उत्पन्न बाजार समितीच्या आवारात मंगळवारी (ता. ३०) भाजीपाल्याच्या दरातील तेजी कायम राहिली. विशेषतः मेथी, शेपू, कोथिंबिरीला चांगला उठाव मिळाल्याचे बाजार समितीच्या सूत्रांकडून सांगण्यात आले.

बाजार समितीच्या आवारात मंगळवारी बाजार समितीच्या आवारात भाज्यांची आवक जेमतेमच राहिली. प्रत्येकी ५ ते ८ हजार पेंढ्यांपर्यंत आवक राहिली. भाज्यांची आवक प्रामुख्याने स्थानिक भागातूनच झाली. त्यातही मेथीला शंभर पेंढ्यांसाठी ६०० ते ११०० रुपये, कोथिंबिरीला ३०० ते ७०० रुपये आणि शेपूला ४०० ते ६०० रुपये असा दर मिळाला. गेल्या काही दिवसांपासून भाज्यांच्या आवकेत सातत्याने घट होत आहे, पण मागणी वाढल्याने दरातील किरकोळ चढ-उतार वगळता तेजी टिकून आहे. मंगळवारीही पुन्हा तिच स्थिती राहिली. त्याशिवाय टोमॅटो, वांग्याचे दर मात्र स्थिर राहिले. त्यांची आवक प्रत्येकी ३० ते ४० क्विंटलपर्यंत राहिली. त्यांचीही आवक कमी होती, पण दर स्थिर राहिले.

टोमॅटोला प्रतिक्विंटलसाठी १००० ते १५०० रुपये, वांग्याला ९०० रुपये ते १३०० रुपये असा दर मिळाला. ढोबळी मिरचीच्या दरातील घसरण पुन्हा तशीच राहिली. ढोबळी मिरचीला प्रतिक्विंटल किमान ७०० रुपये, सरासरी १००० रुपये आणि सर्वाधिक १२०० रुपये असा दर मिळाला. कांद्याच्या दराची स्थितीही काहीशी अशीच होती. कांद्याची आवक २० ते ३० गाड्यांपर्यंत राहिली. कांद्याची आवक बाहेरच्या जिल्ह्यापेक्षा स्थानिक भागातूनच सर्वाधिक झाली. त्यात कांद्याला प्रतिक्विंटला किमान ४०० रुपये, सरासरी १४०० रुपये आणि सर्वाधिक २००० रुपये असा दर मिळाला.