सोलापुरात मुसळधार पाऊस

सोलापूर ः सोलापूर जिल्ह्यात शहरासह ग्रामीण भागात बुधवारी (ता. ६) सायंकाळपासून सुरू झालेला पाऊस गुरुवारी (ता. ७) सकाळपर्यंत बरसतच होता. मृग नक्षत्र उद्या शुक्रवारी (ता. ८) निघत आहे. पण त्या आधीच पावसाने चांगली सुरवात केल्याने शेतकऱ्यांना मोठा दिलासा मिळाला आहे. या कालावधीत त्याचा जोर इतका राहिला की अवघ्या काही तासांत दोन इंच पाऊस झाला. प्रामुख्याने अक्कलकोट, दक्षिण सोलापूर, उत्तर सोलापुरात पावसाचा सर्वाधिक जोर राहिला.

गेल्या काही दिवसांपासून जिल्ह्यात तापमानाने उच्चांक केला आहे. सुमारे ४० ते ४४ अंश सेल्सिअस दरम्यान तापमान स्थिर राहिले. दिवसभर ऊन आणि रात्री प्रचंड उकाडा असे वातावरण राहिल्याने पावसाकडे सगळ्यांचेच डोळे लागले होते. बुधवारीही दिवसभर प्रचंड उकाडा जाणवत होता. सायंकाळी पाचनंतर अचानकपणे वातावरणात बदल झाला आणि पावसाला सुरवात झाली. सायंकाळी सहा वाजता सुरू झालेली पावसाची रिपरिप रात्री उशिरापर्यंत सुरू होती. त्यानंतर पुन्हा मध्यरात्री पावसाने चांगलाच जोर लावला. त्यानंतर थांबून थांबून त्याची रिपरिप सुरूच होती. गुरुवारी (ता. ७) पुन्हा सकाळी सातच्या दरम्यान पावसाने सुरवात केली. अवघ्या तीन तासात सुमारे २५ मिलिमीटर इतका पाऊस झाला.

सकाळी साडेआठ वाजता संपलेल्या २४ तासात १८.५ मिलिमीटर इतक्‍या पावसाची नोंद झाली आहे. उत्तर सोलापुरातील खेड, मार्डी, कारंबा, गुळवंची, वडाळा, नान्नज, दक्षिण सोलापुरातील होटगी, वळसंग, मंद्रूप, विंचूर आणि अक्कलकोट तालुक्‍यातील चपळगाव, हन्नूर, नागणसूर भागात पावसाचा सर्वाधिक जोर राहिला. त्याशिवाय माळशिरस, पंढरपूर भागातही पावसाने जोरदार हजेरी लावली. या पावसामुळे ओढ्या-नाल्याला पाणी आलेच, पण अनेक ठिकाणी शेतामध्ये पाणी साठून राहिल्याने पेरणीसाठी शेतकऱ्यांना दिलासा मिळाला आहे.