सोलापूर दूध संघाला सहा कोटींचा तोटा

सोलापूर : सोलापूर जिल्हा सहकारी दूध उत्पादक संघाने एकूण दूध संकलनातील शिल्लक दूध विक्रीसाठी परजिल्ह्यांत सर्वेक्षण केले. परंतु, शासनाने दरवाढीचा निर्णय घेतल्यापासून आणि अतिरिक्‍त दूध शासनाकडून योग्य दराने खरेदी न केल्याने जिल्हा दूध संघाला गेल्या १० महिन्यांत सुमारे पाच कोटी ८५ लाख रुपयांचा तोटा सहन करावा लागल्याची माहिती जिल्हा दूध संघाचे अध्यक्ष, आमदार प्रशांत परिचारक यांनी दिली.  जिल्हा दूध संघाचे सध्याचे रोजचे संकलन सव्वा लाख लिटर आहे. त्यापैकी पॅकिंगद्वारे ६० हजार लिटर, तर टॅंकरद्वारे सुमारे ५७ हजार लिटर दूध विक्री केले  जाते. परंतु, शासनाने सहकारी दूध संघासाठी ३-५, ८-५च्या दुधाला प्रतिलिटर २७ रुपयांचा दर देणे बंधनकारक केल्याने संघाला तोटा सहन करावा लागत आहे. शिल्लक असलेल्या दुधाची विल्हेवाट वेळेवर लावणे गरजेचे असल्याने लातूर, नांदेड, परभणी, बीड, औरंगाबाद, अकोला, अमरावती, पुणे व हैदराबाद या ठिकाणी दुधाच्या मागणीचे सर्वेक्षण केले असून, त्या ठिकाणी पॅकिंगद्वारे दूध विक्रीचे नियोजन असल्याचे श्री. परिचारक यांनी सांगितले; पण त्यातही अडचणी आहेत. शिवाय खासगी दूध संघाचे पेव जिल्ह्यात असल्याने सहकारी दूध संघासमोर आव्हान उभे राहिले आहे.  दूध उत्पादक शेतकऱ्यांच्या हितासाठी सहकारी दूध संघाची धडपड सुरू आहे. शासनाने सहकारी दूध संघांबरोबरच खासगी दूध संघांवरही निर्बंध आणणे शेतकरीहिताचे असल्याचे ते म्हणाले. त्यातच दूध पावडरचे दरही घसरल्याने अडचणी वाढतच आहेत, असेही श्री. परिचारक म्हणाले. दूध उत्पादक शेतकऱ्यांना अन्य राज्यांप्रमाणे थेट अनुदान देण्याची, अतिरिक्‍त दूध शासनाने हमीभावाने खरेदी करण्याची गरज, असेही ते म्हणाले. श्री. परिचारक भारतीय जनता पक्षाचे विधीमंडळातील सहयोगी सदस्य आहेत. त्यांनी स्वतःच आता सरकारच्या धोरणावर बोट ठेवल्याने त्यांच्या बोलण्याला आता महत्त्व आले आहे.