सोलापुरात भाजीपाल्यासह कांद्याचे व्यवहार सुरळीत

सोलापूर ः भीमा-कोरेगाव घटनेचे पडसाद सोलापूर जिल्ह्यात सर्वत्र उमटले. मंगळवारी (ता.२) बाजार समितीतील माथाडी कामगारांनी अचानकपणे बंद पुकारल्याने शेतकऱ्यांचे हाल झाले. त्यानंतर बुधवारीही (ता.३) पुन्हा दुसऱ्या दिवशी महाराष्ट्रव्यापी बंदमुळे भाजीपाल्यासह कांद्याचे लिलाव रखडण्याची शक्‍यता होती; पण हे सर्व व्यवहार सुरळीत सुरू झाले.

दुसरीकडे जिल्ह्यात किरकोळ घटना वगळता अक्कलकोट, पंढरपूर, माढा, माळशिरस भागात तणावपूर्ण शांतता राहिली. बाजार समितीतील व्यवहारासह दूध व अन्य भाजीपाल्याचीही आवक-जावक सुरळीत झाली.

बाजार समितीच्या आवारात मंगळवारी मध्यरात्रीच माथाडी कामगारांनी काम बंद आंदोलन पुकारल्याने शेतकऱ्यांची अडचण झाली होती; पण आज (बुधवारी) बंद असूनही हमालांनी त्यात सहभागी न होता, व्यवहार सुरळीत ठेवण्यास मदत केल्याने बाजार समितीतील भाजीपाल्यासह कांद्याच्या गाड्या उतरणे आणि भरण्यासह सर्व व्यवहार सुरळीत झाले.

त्यामुळे शेतकऱ्यांनीही सुटकेचा निःश्‍वास टाकला. बाहेरून येणाऱ्या दूध आणि भाजीपाल्याच्या गाड्याही सकाळीच मार्केट यार्डात पोचल्या आणि काही वेळातच त्या विक्री केंद्रावर पोचल्याने वाहतुकीत फारशी अडचण झाली नाही; जिल्ह्यात सुमारे ३ हजारांहून अधिक पोलिसांचा चोख बंदोबस्त ठेवण्यात आला होता.

दूध वाहतूकही सुरळीत

जिल्ह्यात जिल्हा दूध संघ आणि तालुकास्तरावरील अन्य खासगी संघासह जिल्ह्याचे रोजचे दूध संकलन सुमारे ११ ते १२ लाख लिटर आहे. पण हे सगळे दूध सकाळीच संकलन होऊन त्या-त्या शीतगृह केंद्रावर पोचल्याने दूध वाहतुकीलाही बंदची फारशी झळ बसली नाही. दुधाची वाहतूक सुरळीत सुरू होती.