सोलापूरात सहकारमंत्र्यांच्या कारखान्याने ऊसदराची कोंडी फोडली

 स्वाभिमानी, रयतसह शेतकरी संघटनांनाही मान्य  सोलापूर ः गेल्या पंधरा दिवसांपासून ऊसदराच्या प्रश्नावरून सोलापूर जिल्ह्यात शेतकरी संघटना रस्त्यावर उतरल्याने आंदोलनाची धग वाढली होती, पण मंगळवारी (ता.२१) सायंकाळी सहकारमंत्री सुभाष देशमुख यांच्या लोकमंगल साखर कारखान्याने एफआरपी आणि ४०० रुपये असा दर जाहीर केला. या निर्णयाने जिल्ह्यातील ऊसदराची कोंडी फुटली आहे.  भाजपचे जिल्हाध्यक्ष तथा कारखान्याचे संचालक शहाजी पवार, चेअरमन महेश देशमुख यांनी स्वाभिमानी शेतकरी संघटनेचे नेते रविकांत तुपकर, रयत संघटनेचे दीपक भोसले, मनसेचे दिलीप धोत्रे, जनहित शेतकरी संघटनेचे प्रभाकर देशमुख यांची बैठक घेऊन ऊसदरासंबंधी चर्चा केली, त्यानंतर पत्रकार परिषद घेऊन या निर्णयाची माहिती दिली.  याबाबत श्री. पवार म्हणाले, ‘‘आम्ही शेतकरी संघटनेशी चर्चा केली. या आंदोलनात सहकारमंत्री आणि त्यांच्याच कारखान्याला टार्गेट केले जात होते, पण कुठे तरी हे थांबले पाहिजे, या हेतूने सहकारमंत्र्यांशी याबाबत चर्चा केली आहे आणि निर्णय घेतला. अन्य कारखान्यांनी त्यापद्धतीने निर्णय घ्यावा.’’ या निर्णयाबाबत स्वाभिमानीचे नेते तुपकर म्हणाले, ‘‘सहकारमंत्र्यांच्या निर्देशानुसार हा निर्णय घेतला आहे. कोल्हापूर, सांगलीमध्ये एफपआरपी आणि २०० रुपये मिळाले. सोलापुरात एफआरपी आणि ४०० रुपये मिळाले आहेत, अन्य कारखान्यांनी या पद्धतीने दर द्यावा, नाही तर संबंधित कारखान्यावर गुन्हे दाखल करावेत, पण कारखाने निर्णय घेत नसतील, तर त्या कारखान्यासमोर पुन्हा आंदोलन करू’’ प्रभाकर देशमुख, दीपक भोसले यांनीही अशीच भूमिका मांडली आणि या निर्णयाला पाठिंबा दिला. ऊस तुटल्यापासून १४ दिवसांत पैसे  ऊस तुटल्यापासून १४ दिवसांत पैसे शेतकऱ्यांना मिळायला हवेत, अन्य कारखाने निर्णय घेणार नसतील, पैसे देणार नसतील तर सर्व शेतकरी संघटना एकत्र येऊन आंदोलनाची दिशा ठरवू, असे श्री. तुपकर म्हणाले.  असा असेल तोडगा एफआरपी अधिक ४०० रुपये देण्यात येणार अाहेत. त्यापैकी एकरकमी एफआरपी आणि ३०० रुपये आणि उर्वरित १०० रुपये महिनाभराने देण्यात येणार अाहेत.