यवतमाळ : पॉवरग्रीड कंपनीच्या वतीने महागाव, पुसद तालुक्‍यांतील शेतशिवारात वीजवाहिनीसाठी टॉवर उभारणीचे काम सुरू आहे. यासाठी जमीन घेतलेल्या शेतकऱ्यांना अत्यल्प मोबदला दिला जात असून, तो बाजारभावापेक्षा चारपट मिळावा, अशी मागणी टॉवर विरोधी कृती समितीने केली. राष्ट्रवादी काँग्रेस पक्षाचे अध्यक्ष शरद पवार यांची दिल्लीत भेट घेत ही मागणी करण्यात आली.
टॉवर विरोधी कृती समितीचे अध्यक्ष रामभाऊ गायकवाड, प्रशांत बोपीलवार, अविनाश वानखडे, किरण रेडे पाटील, रणजीत कवडे यांचा शिष्टमंडळात समावेश होता. विकासाचा बागुलबुवा उभा करून सुपीक जमीन बळकावल्या जात असल्याचा आरोप या वेळी शेतकऱ्यांनी केला. पावरग्रीड कंपनी यासाठी दंडेलशाहीचा अवलंब करीत आहे.
कमी मोबदला मिळाल्याने काही शेतकरी न्यायालयात गेले. ही प्रकरणे न्यायालयात प्रलंबित असताना पोलिसांची मदत घेत जबरीने शेतात मनोरे उभारले जात आहेत. एकट्या महागाव तालुक्‍यात 95 मनोरे उभारणीचे काम प्रगतिपथावर आहे. यातील बहुतांश शेतकरी अपुऱ्या मोबदल्याच्या कारणामुळे न्यायालयात गेले आहेत.
न्यायालयीन प्रक्रिया सुरू असतानाच मनोरे उभारणीदेखील केली जात आहे. रस्ते कामासाठी घेतलेल्या जमिनीचा मोबदला शेतकऱ्यांच्या खात्यात जमा करण्यात आला. परंतु त्या नियमानुसार मनोरे उभारणीचे पैसे दिले गेले नाही.
शेतकऱ्यांना बाजारभावापेक्षा चारपट मोबदला मिळावा, यासाठी राष्ट्रवादी काँग्रेसच्या माध्यमातून प्रयत्न व्हावा, अशी मागणी करण्यात आली. शरद पवार यांनी टॉवरग्रस्त शेतकऱ्यांच्या समस्या सोडविण्यासाठी प्रयत्न करू, असे आश्‍वासन या वेळी शिष्टमंडळाला दिले.
Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.
ताज्या कृषी घडामोडींसाठी फेसबुक, ट्विटर, इन्स्टाग्राम , टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.