भारतासह दक्षिण आशियात यंदा सामान्य पाऊस

भारतासह दक्षिण आशियात यंदा सामान्य पाऊस
भारतासह दक्षिण आशियात यंदा सामान्य पाऊस

पुणे : भारतासह दक्षिण आशियातील देशांच्या बहुतांशी भागांत मॉन्सूनचा पाऊस सर्वसामान्य पडेल, असा अंदाज साउथ एशियन क्‍लायमेट आउटलुक फोरमतर्फे (सॅस्कॉफ) व्यक्त करण्यात आला आहे. महाराष्ट्रात यंदा सरासरीइतका पाऊस पडण्याची शक्यता अधिक आहे, तर आंध्र प्रदेश, ओडिशासह पूर्व-मध्य भारताच्या काही भागात सरासरीपेक्षा अधिक पाऊस; तर राजस्थान, गुजरात, तमिळनाडू, अरुणाचल प्रदेश, नागालँड, मणिपूरसह ईशान्य भारतात सरासरीपेक्षा कमी पावसाची शक्यता अधिक असल्याचा अंदाज वर्तविण्यात आला आहे. फोरममार्फत गेल्या वर्षीही सामान्य पावसाचा अंदाज व्यक्त करण्यात आला होता. गेल्या वर्षीच्या मॉन्सूनच्या पावसाचा आढावा आणि येत्या हंगामातील अंदाज व्यक्त करण्यासाठी दक्षिण आशियाई देशांच्या फोरमची बारावी दोन दिवसीय बैठक पुण्यात (१९-२० एप्रिल) झाली. भारतासह सर्व दक्षिण आशियाई देशांतील राष्ट्रीय व विभागीय पातळीवरील हवामानविषयक संशोधन संस्थांकडून माहिती विश्‍लेषण व विचारमंथनानंतर हा अंदाज जाहीर करण्यात आला. जगभरातील हवामान स्थिती, विविध हवामान मॉडेलचा विचार करून हा अंदाज तयार करण्यात आला आहे.  प्रशांत महासागरातील पाण्याच्या पृष्ठभागााचे तापमान सरासरीपेक्षा कमी असल्याने सध्या या भागात सौम्य ‘ला निना’ स्थिती आहे. ही स्थिती माॅन्सून सुरू होईपर्यंत सर्वसाधारण होईल, यावर सर्वच सहभागी शास्त्रज्ञांचे एकमत झाले. काही जागतिक मॉडेल्सच्या अभ्यासानुसार मॉन्सूनच्या अखेरच्या टप्प्यात किंवा माॅन्सूननंतर प्रशांत महासागरातील पाण्याचे तापमान वाढून ‘एल निनो’ स्थिती निर्माण होण्याची शक्यता आहे. मात्र, ‘ला-निना’चे निवळून ‘एल-निनो’ स्थिती नेमकी केव्हा निर्माण होईल, याबाबत अनिश्‍चितता असल्याचे या वेळी नमूद करण्यात आले. इंडियन ओशन डायपोल, उष्णकटिबंधीय अटलांटिक समुद्राच्या पृष्ठभागाचे तापमान, युरेशियन जमिनीचे तापमान आदी प्रादेशिक आणि जागतिक घटकांचा माॅन्सून क्षेत्रातील पावसावर परिणाम होऊ शकतो, असे मत या वेळी व्यक्त करण्यात आले. दरम्यान, बंगालचा उपसागर आणि अरबी समुद्राच्या पृष्ठभागाच्या तापमानाचा फरक म्हणजे इंडियन ओशन डायपोल (आयओडी) स्थिती सर्वसाधारण स्थितीत आहे, तर मॉन्सूनच्या मध्यावर ही स्थिती नकारात्मक होण्याची शक्यता आहे. उत्तर गोलार्धातील डिसेंबर, फेब्रुवारी महिन्यात बर्फाचे प्रमाण सर्वसाधारण होते, तर मार्च महिन्यापासून सरासरीपेक्षा अधिक होते. उत्तर गोलार्धातील हिवाळा व उन्हाळ्यातील बर्फाचे प्रमाण व आशियातील मॉन्सून यांच्यात परस्परविरोधी संबंध असतो. महाराष्ट्रात सरासरीइतक्या पावसाचा अंदाज ‘सॅस्काॅफ’मार्फत पावसाच्या अंदाजाविषयी प्रसिद्ध करण्यात आलेल्या नकाशानुसार महाराष्ट्रात सरासरीइतक्या पावसाची शक्यता आहे. कोकण आणि विदर्भात सरासरीइतक्या पावसाची शक्यता ५० ते ६० टक्के, तर मध्य महाराष्ट्र, मराठवाड्यात ४० ते ५० टक्के आहे. कोकण, गोव्यासह कर्नाटक किनारपट्टी, विदर्भ, छत्तीसगड, झारखंडमध्ये सरासरीइतका पाऊस पडण्याची शक्यता अधिक आहे. ओडिशा, आंध्र प्रदेशात सरासरीपेक्षा अधिक पाऊस पडण्याची शक्यता ४० ते ५० टक्के अाहे, तर तमिळनाडू, पश्‍चिम राजस्थान, गुजरातमधील कच्छ, आसाम, अरुणाचल प्रदेश, नागलँड, मणिपूर राज्यांमध्ये सरासरीपेक्षा कमी पाऊस पडण्याची शक्यता अधिक असल्याचे स्पष्ट होत आहे.

Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.

ताज्या कृषी घडामोडींसाठी फेसबुक, ट्विटर, इन्स्टाग्राम टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.

Related Stories

No stories found.
Agrowon
agrowon.esakal.com