तासगाव तालुक्यात १९ हजार हेक्‍टरवर पेरणी

सांगली ः तासगाव तालुक्‍यात खरीप हंगामाच्या पेरणीला वेग आला आहे. तालुक्‍यात १९ हजार ६३ हेक्‍टरवर पेरणी झाली आहे. मात्र, पावसाने उघडीप दिल्याने शेतकरी अस्वस्थ झाला आहे. तालुक्‍यात खरीप हंगामात भुईमूग, सोबायीनच्या क्षेत्रात घट झाली आहे. ज्वारी आणि मका पिकांच्या क्षेत्रात वाढ होण्याची शक्‍यता कृषी विभागाने वर्तविली आहे.

सध्या तासगाव तालुक्‍यात पावसाने उघडीप दिली आहे. त्यामुळे शेतकऱ्यांनी पेरणी थांबवली आहे. मात्र, वाफसा पाहून पेरणी करण्यासाठी शेतकरी पुढे येत असल्याचे चित्र आहे. तालुक्‍यात खरीप ज्वारीचे क्षेत्र १८ हजार ६२८ हेक्‍टर इतके असून, त्यापैकी १२ हजार ३२० हेक्‍टरवर ज्वारीची पेरा झाला आहे. सर्वाधित पेरा ज्वारीचा झाला आहे. गत हंगामात सोयाबीनला अपेक्षित दर मिळाला नाही. त्यात हमीभावाने सोयाबीनची विक्री करायची असल्यास सातबाऱ्यावर सोयाबीनची नोंद हवी ही अट शासनाने घातली होती. त्यामुळे शेतकऱ्यांनी सोयाबीन पिकाऐवजी मका, ज्वारी पिकाची पेरणी करण्यासाठी पुढे आले आहेत. त्यामुळे तालुक्‍यात ज्वारी आणि मका पिकाच्या क्षेत्रात वाढ होण्याची शक्‍यता आहे. कडधान्याच्या क्षेत्रातही वाढीची शक्‍यता आहे.

तालुक्‍यात यंदाच्या हंगामात सुमारे ३५ हजार हेक्‍टरवर खरिपाची पेरणी होण्याची शक्‍यता आहे. कृषी विभागाने खरीप पीक लागवडीबाबत मार्गदर्शन करत आहे. कृषी केंद्रात धान, तूर, मूग, उडिद व इतर पिकांचे बियाणे उपलब्ध आहेत. जुलैच्या दुसऱ्या आठवड्यापर्यंत तालुक्‍यातील शंभर टक्के पेरणी पूर्ण होईल, अशी माहिती तालुका कृषी अधिकारी राजाराम शिंदे यांनी दिली.