हिंगोली जिल्ह्यात २ लाख हेक्टरवर पेरणी

हिंगोली ः हिंगोली जिल्ह्यात यंदाच्या खरीप हंगामात बुधवार (ता. २७) पर्यंत २ लाख ४ हजार ८८३ हेक्टर (६०.२० टक्के) क्षेत्रावर पेरणी झाली. सोयाबीन, तुरीचा पेरा वाढला आहे, तर कपाशीची लागवड कमी झाली आहे. या संदर्भात जिल्हा अधीक्षक कृषी अधिकारी व्ही. डी. लोखंडे यांनी माहिती दिली.

जिल्ह्यात यंदा खरिपाचे सरासरी क्षेत्र ३ लाख ४० हजार ३१० हेक्टर आहे. जूनच्या पहिल्या पंधरवड्यात झालेल्या पावसानंतर तसेच त्यानंतर पडलेल्या खंडानंतर आलेल्या पावसानंतर जिल्ह्यातील शेतकऱ्यांनी पेरणी सुरू केली. बुधवार (ता. २७) पर्यंत जिल्ह्यातील सर्व पाच तालुक्यांत एकूण २ लाख ४ हजार ८८३ हेक्टरवर म्हणजेच्या सरासरी क्षेत्राच्या ६०.२० टक्के क्षेत्रावर पेरणी झाली आहे.

यंदा सोयाबीनच्या क्षेत्रात वाढ झाली आहे. कपाशी, मूग, उडीद, ज्वारी, बाजरीच्या क्षेत्रात घट झाली आहे. सोयाबीनची पेरणी १ लाख ३२ हजार ६८ हेक्टर (९९.९५ टक्के), कपाशीची लागवड ३१ हजार १७१ हेक्टर (३६.९९ टक्के), तुरीची पेरणी २७ हजार ८०६  हेक्टर (९९.५२ टक्के), मूग ५ हजार ५९३ हेक्टर (३०.९५ टक्के), उडीद ३ हजार ६३१ हेक्टर (२२.११ टक्के), ज्वारी ३ हजार ७७० हेक्टर (८.४० टक्के), मक्याची ६५२ हेक्टर (९८.७९ टक्के). सेनगाव तालुक्यात खरिपाचे क्षेत्र वाढले आहे. यंदा  ६१ हजार ५३७ हेक्टरवर (१२०.९८ टक्के) पेरणी झाली आहे. हिंगोली तालुक्यात १६ हजार ३९ हेक्टर (२१.०९ टक्के), कळमनुरी तालुक्यातील ४९ हजार १९१ हेक्टर (७१.४४ टक्के), वसमत तालुक्यातील ३६ हजार ४७३ हेक्टर (४४.०२ टक्के), औंढा नागनाथ तालुक्यातील ४१ हजार ६४३ हेक्टर (६७.५० टक्के) पेरणी क्षेत्राचा समावेश आहे.