पेरणीच्या दरात तीनशे रुपयांनी वाढ

शहा (सकाळ वृत्तसेवा) : सिन्नरच्या पूर्व भागात खरिपाच्या पेरणीला वेग आला आहे. पावसाच्या दोन दिवसांच्या विश्रांतीनंतर जमिनीत वाफसा झाल्याने अख्खा शेतशिवार पेरणीसाठी गजबजला आहे. मोजक्‍याच शेतकऱ्यांकडे बैलजोडी असल्याने तुरळक ठिकाणीच बैलांच्या सहाय्याने पेरणी पाहावयास मिळत आहे. यंदा पेरणीच्या दरात मागील वर्षाच्या तुलनेत दोनशे ते तीनशे रुपयांनी वाढ झाली आहे.

ट्रॅक्‍टरद्वारे पेरणीला शेतकऱ्यांची अधिक मागणी आहे. पूर्व भागातील शहा, भरतपूर, झापेवाडी, उजणी, मिठसागरे, पाथरे, वारेगाव, पंचाळे, सायाळे, धारणगाव, फर्दापूर आदी ठिकाणी पेरणीची लगबग सुरू आहे. विहीर, तसेच बंधाऱ्याच्या पाणीसाठ्यात वाढ झाली नसली तरी पावसाच्या ओलीवर पेरणी जुगार खेळला जात आहे. येत्या दोन-चार दिवसांत पन्नास टक्‍क्‍यांहून अधिक पेरणी होण्याचा अंदाज आहे. पेरणीची एकच लगीनघाई सर्वत्र असल्याने साहजिकच ट्रॅक्‍टरच्या सहाय्याने केली जाणारी पेरणीदेखील महागली आहे.

रणीच्या दरात मागील वर्षाच्या तुलनेत दोनश ते तीनशे रुपयांनी वाढ झाली असून, एकरी पेरणीसाठी एक हजार १०० ते एक हजार २०० रुपये खर्च येत आहे. मागील वर्षीचा पेरणीचा दर एकरी ९०० रुपये होता. डिझेलच्या वाढलेल्या दरामुळे पेरणीचे दर वाढले आहे. जमिनीत पुरेशी ओल असल्याने निदान पेरणीनंतर पंधरा दिवस तरी पिके तग धरणार आहेत.

मका, सोयाबीनवर विशेष भर खरीप पेरणीत बाजरी, तूर, मठ, मूग या पिकांकडे पाठ फिरविल्याने सोयाबीन, मका पिकांवर विशेष भर दिला आहे. मक्‍याला या वर्षी मिळालेला भाव, तसेच सोयाबीन दीर्घकाळ टिकणारी असल्याने या पिकांची पेरणी सिन्नरच्या पूर्व भागात मोठ्या प्रमाणावर केली जात असल्याचे दिसून येत आहे.