पुणे विभागात उन्हाळी पिकांची ९४३० हेक्‍टरवर पेरणी

मागील काही वर्षांपासून उन्हाळ्यात चाराटंचाईचा मोठा प्रश्न उद्भवत आहे. त्यामुळे शेतकरी मोठ्या प्रमाणात चारा पीक लागवडीकडे वळू लागले आहे. परिणामी विभागात उन्हाळी पिकाच्या क्षेत्रात घट होत असल्याचे चित्र आहे.

गेल्या वर्षी चांगला पाऊस झाला. यामुळे स्रोतांमधील पाणीपातळीत बऱ्यापैकी वाढ झाली. त्यामुळे उन्हाळी पिकांच्या क्षेत्रात काही प्रमाणात वाढ होण्याची शक्‍यता आहे.

 

उन्हाळी मक्‍याची २५२०, बाजरीची २५५०, उन्हाळी मुगाची १०, भुईमुगाची ४३५० हेक्‍टरवर पेरणी झाली आहे.  विभागातील नगर जिल्ह्यात रब्बी हंगामातील ज्वारीची काढणी पूर्ण होत आली आहे. गहू व हरभऱ्याची काढणी सुरू आहे. उन्हाळी हंगामातील मका व भुईमुगाच्या पेरणीस सुरवात झाली असून, पेरणी झालेली पिके वाढीच्या अवस्थेत आहे. नगर, पारनेर, श्रीगोंदा, कर्जत, जामखेड, नेवासा, राहुरी, कोपरगाव, श्रीरामपूर या तालुक्‍यांत उन्हाळी पिकांची पेरणी झाली आहे. 

 

पुणे जिल्ह्यामध्ये रब्बी हंगामातील ज्वारीची काढणी पूर्णत्वास आली आहे. गहू, हरभरा पिकाची काढणी सुरू आहे. उन्हाळी हंगामातील बाजरी व भुईमुगाच्या पेरणीस सुरवात झाली आहे. काही ठिकाणी बाजरी, भुईमूग पीक वाढीच्या अवस्थेत आहे. हवेली, भोर, जुन्नर, खेड, आंबेगाव, शिरूर, बारामती, इंदापूर, दौंड या तालुक्‍यांत उन्हाळी पिकांची पेरणी झाली आहे.  

 

सोलापूरमध्ये रब्बी ज्वारीची काढणी पूर्णत्वास आली आहे. गहू व हरभऱ्याची काढणी चालू आहे. जिल्ह्यात उन्हाळी हंगामातील मका व भुईमूग पिके वाढीच्या अवस्थेत आहे. उत्तर सोलापूर, दक्षिण सोलापूर, बार्शी, मोहोळ, पंढरपूर, माळशिरस, सांगोला, मंगळवेढा तालुक्‍यांत काही प्रमाणात उन्हाळी पिकांची पेरणी झाली आहे. 

जिल्हानिहाय झालेल्‍या पेरण्या ः (हेक्‍टर)

जिल्हा	सरासरी क्षेत्र	पेरणी झालेले क्षेत्र	टक्के
नगर	८४००	११७०	१३
पुणे	६४६०	५२३०	८१
सोलापूर	८४४०	३०३०	३५
एकूण	२३,३००	९४३०	४०