बुलडाण्यात सोयाबीनला खोडकिडीने पोखरले

बुलडाणा : जिल्ह्यात विविध भागांत सोयाबीनच्या पिकावर खोडकिडीचा प्रादुर्भाव वाढत असून शेतकरी चिंतातूर झाले अाहेत. खोडकिड्यासह करपा आल्याने सोयाबीन पिकाच्या फूल, शेंगा करपून काळ्या पडू लागल्या अाहेत. यामुळे ठिकठिकाणी सोयाबीनचे पीक धोक्यात आले आहे.

संग्रामपूर तालुक्यात सर्वाधिक लागवड क्षेत्र असलेल्या सोयाबीनवर खोडकीड वाढली अाहे. त्यामुळे झाडांची वाढ थांबणे, शेंगा सुकणे, दाणे न भरणे, असा फटका बसत आहे. म्हणून स्वाभिमानी शेतकरी संघटनेच्या युवा अाघाडीचे जिल्हाध्यक्ष प्रशांत डिक्कर आणि त्यांच्या सहकाऱ्यांसह संग्रामपूर तालुका कृषी अधिकारी डी. बी. सवडतकर यांनी शेतात जाऊन पाहणी केली. यावेळी पिकावर प्रचंड प्रमाणात खोड कीड आल्याचे दिसून आले. याबाबत अहवाल वरिष्ठांकडे पाठवणार असल्याचे कृषी विभागाच्या अधिकाऱ्यांनी सांगितले. उपाययोजनेसंबंधी शेतकऱ्यांना मार्गदर्शनही केले.

यावेळी कृषी अधिकारी सी. पी. उंदरे, कृषी मंडळ अधिकारी जी. डी. नांगे, कृषी सहायक एम. डी मोहीते, बी. एम असंबे, एम बी. निकम, तसेच स्वाभिमानीचे रोशन देशमुख, आशिष नांदोकार, नंदकिशोर बोडखे, पुरुषोत्तम भुते, गणेश डाबरे, वासुदेव ढगे, रुपेश ढगे, दिनेश टाकळकर, संतोष घायल, गजानन अस्वार, तुकाराम रौंदळे, योगेश धुर्डे, गणेश डाबरे अादी शेतकरीही उपस्थित होते.