सोयाबीनची हमीभावापेक्षा कमी दराने खरेदी

जळगाव : कृषी उत्पन्न बाजार समितीमध्ये सोयाबीनची आवक काहीशी वाढली आहे. पण, त्याचे दर मात्र २४०० रुपये प्रतिक्विंटलपासून ते २६०० रुपये प्रतिक्विंटलपर्यंत आहेत. आवकेत जशी वाढ होत आहे, तसे दर पाडले जात असल्याचा प्रकार घडत असल्याच्या तक्रारी शेतकऱ्यांनी केल्या आहेत.  बाजार समितीमध्ये उडीद, मूग, सोयाबीन खरेदी केंद्र मागील आठवड्यात सुरू झाले. परंतु, या केंद्रात कमी दर्जाचा, ओला माल (नॉन एफएक्‍यू) असल्याचे सांगून शेतकऱ्यांना परतावून लावले जात आहे. शेतकरी जो माल आणतात तो घरी नेण्यासाठी पुन्हा वाहतूक खर्च लागेल, नुकसान होईल, यामुळे तो बाजार समितीत व्यापाऱ्याकडे नेतात. पण व्यापाऱ्यांकडे कमाल २६०० रुपये प्रतिक्विंटल दर आहेत.  शासनाने सोयाबीनला ३०५० रुपये प्रतिक्विंटलचा हमीभाव जाहीर केलेला असला, तरी हमीभावापेक्षा कमी दरामध्ये सर्रास सोयाबीनची खरेदी बाजार समितीमध्ये केली जात आहे. कमी दर्जाचा माल म्हणून एवढी लुटालूट सुरू असल्याने शेतकरीही अडचणीत आले आहेत; पण याकडे लक्ष द्यायला कुणी तयार दिसत नाही.  सोयाबीन काढणीला दिवाळीनंतर वेग आला. आजघडीला सर्वत्र सोयाबीनची काढणी जवळपास पूर्ण झालेली दिसत आहे. जिल्हाभरात २९ हजार हेक्‍टरवर सोयाबीनची पेरणी झाली होती. उत्पादन दोन क्विंटल प्रतिएकरपासून चार क्विंटलपर्यंत आले आहे. उत्पादन हवे तसे नसतानाच दरांबाबत समाधानकारक स्थिती नसल्याने दुहेरी फटका शेतकऱ्यांना सहन करावा लागला आहे. बाजार समितीमध्ये मागील महिन्यात प्रतिदिन ७०० क्विंटल सोयाबीनची आवक होत होती. आता ती वाढली आहे. पुढील काळात आणखी मध्य प्रदेशातील सोयाबीन यायला सुरवात होईल, त्यामुळे दर आणखी पाडले जाण्याची भीती शेतकऱ्यांना आहे.