खानदेशात सोयाबीन मळणीला वेग

जळगाव : खानदेशात सोयाबीनची मळणी वेगात सुरू आहे. ढगाळ वातावरण कायम असल्याने शेतकऱ्यांनी धसका घेतला आहे. अनेक भागात कापणी पूर्ण झाली आहे. परंतु मळणी राहिली आहे. मळणी लवकर उरकून धान्य घरात आणण्याची लगबग शेतकऱ्यांमध्ये सुरू आहे.

सोयाबीनची पेरणी धुळे जिल्ह्यातील शिरपूर, धुळे भागात झाली होती. नंदुरबार जिल्ह्यात तळोदा व शहादा भागात सोयाबीनचे पीक अधिक होते. जळगाव जिल्ह्यात चोपडा, यावल, जळगाव, पाचोरा भागात पेरणी अधिक झाली होती. परंतु मागील दोन तीन दिवसांपासून ढगाळ वातावरण आहे. सर्वत्र सोयाबीन कापणी किंवा मळणीच्या अवस्थेत आहे. जळगाव, चोपडा, शहादा भागात कापणी संपत आली आहे.

मळणीसाठी पंजाब, हरियाणा भागातील मळणीयंत्र चालक दाखल झाले आहेत. परंतु काळ्या कसदार जमिनीत काही ठिकाणी फारसा वाफसा नसल्याने ते मळणीला नकार देत आहेत. ऊन नसल्याने सोयाबीन कापणी करून तो वाळण्याची प्रतीक्षा शेतकरी करीत आहेत. कारण आर्द्रतायुक्त दाण्यांना दरही कमी मिळतात. दाणे काळवंडण्याची भीती असते. मळणीचे दर यंदा स्थिर आहेत. २०० रुपये प्रतिक्विंटलचे दर मळणीयंत्रचालक घेत आहेत. सोयाबीनचे दर बाजारात सध्या ३३०० पर्यंत आहेत. सुरवातीच्या दरांचा लाभ मिळावा, यासाठी लवकर मळणी व वाळवणूक करून त्याची बाजारात पाठवणूक करण्यासाठी शेतकरी प्रयत्नशील आहेत.

वाफशाअभावी मळणीयंत्रचालक शेतात यंत्र नेण्यास असमर्थता दर्शवित असून शेतकऱ्यांना अडचण येत आहेत. रब्बीची पेरणी करण्यासाठी शेतकऱ्यांची सोयाबीन मळणी उरकून घेत आहेत.