गेटवरच सोयाबीनची कमी दराने खरेदी

यवतमाळ : पुसद बाजार समितीच्या प्रवेशद्वारातच हमीभावापेक्षा कमी दराने सोयाबीनची खरेदी होत असल्याचे पाहून संतप्त शेतकऱ्यांनी बाजार समितीत धडक देत याप्रकरणी जाब विचारला. शेतकऱ्यांच्या सोयीकरिता ही व्यवस्था असल्याचे सांगत बाजार समिती प्रशासनाने सांगितल्याने शेतकऱ्यांमध्ये रोष व्यक्‍त होत आहे.  पुसद बाजार समितीसमोरच काही व्यापाऱ्यांनी शेड उभारत खुलेआम खेडा खरेदी चालविली आहे. २२०० ते २४०० रुपये इतक्‍या कमी दराने व्यापारी सोयाबीन खरेदी करत आहेत. (कै.) वसंतराव नाईक यांचा पुसद हा गृहतालुका, शेतकऱ्यांसाठी अहोरात्र काम केलेल्या या नेत्याच्या तालुक्‍यातच अशाप्रकारे शेतकऱ्यांची लूट होत असल्याचे पाहून शेतकरी अस्वस्थ झाले. वाकद (ता. महागाव) येथील मनीष जाधव यांच्या नेतृत्वात शेतकऱ्यांनी बाजार समितीत याप्रकरणी धडक दिली. बाजार समिती प्रशासनाशी या संदर्भाने चर्चा करण्यात आली; परंतु बाजार समिती प्रशासनाने याप्रकरणी कारवाईचे आश्‍वासन देण्याऐवजी बाजार समितीबाहेरील व्यवस्था शेतकऱ्यांच्या सोयीकरिता असल्याचे सांगत शेतकऱ्यांची थट्टा करण्याचा प्रयत्न केला. या कारणामुळे शेतकऱ्यांमध्ये प्रचंड रोष व्यक्‍त होत होता. 

हमीभाव केंद्र सुुरू करा जिल्ह्यात २९ शासकीय खरेदी केंद्र सुरू करण्याचे प्रस्तावित आहे. मात्र अद्यापही त्यातील एकही केंद्र सुरू झाले नाही. त्यामुळे व्यापाऱ्यांकडून होणारी लूट सुरूच आहे. या संदर्भाने लवकरच निर्णय न झाल्यास जिल्हाभरात आंदोलन करू, असा इशारा मनीष जाधव यांनी दिला आहे.