नागपूर : शेतकऱ्यांकडील ९० टक्‍के सोयाबीन विकल्या गेल्यानंतर आता बाजारात सोयाबीन दरात तेजी आली आहे. विदर्भात सर्वदूर सोयाबीन ३५०० रुपये प्रतिक्‍विंटलपेक्षा अधिक दराने विकले जात आहे. वाशीम बाजार समितीत सोयाबीनने ४ हजार रुपये क्‍विंटलचा पल्ला गाठला होता. त्यानंतर आता सोयाबीन दर वाशीममध्ये ३७०० रुपयांवर स्थिरावला आहे. नागपूरच्या कळमणा बाजारात सोयाबीन ३६६० रुपये क्‍विंटल आहे. मध्य प्रदेश सोयाबीन लागवड आणि उत्पादनासाठी प्रसिद्ध आहे. त्यापाठोपाठ विदर्भातही सोयाबीन लागवडीचा पॅटर्न रुजला. वाशीम जिल्हयात शेतकऱ्यांची सर्वाधीक सोयाबीनला पसंती आहे. परंतु नजीकच्या काळात दराच्या बाबतीत निराशा होऊ लागल्याने हळद आणि इतर पर्यायी पिकाकडे शेतकरी वळू लागल्याचे चित्र आहे. वाशीम परिसरात प्रक्रिया उद्योगांची उभारणीदेखील नजीकच्या काळात झाली आहे. त्याच्याच परिणामी येथील बाजारात सोयाबीनने गेल्या महिन्यात चार हजार रुपये क्‍विंटलचा पल्ला गाठला होता. अमरावती बाजार समितीतदेखील सोयाबीन ३६०० रुपयांवर पोचले. नागपूर (कळमणा) बाजार समितीत ३७०० रुपये क्‍विंटलचा दर सोयबीनला मिळाला. ५ फेब्रुवारी रोजी सोयाबीन विक्री ३६६० रुपये क्‍विंटलने विकल्या गेले. ३० जानेवारी रोजी सायोबीन ३७७५ रुपये क्‍विंटल होते. त्यात काही अंशी घसरण झाल्याचे चित्र आहे. परंतु यापूर्वी २८०० रुपये इतका अत्यल्प दर सोयाबीनला मिळाला. बाजारात संत्र्याची आवकसुद्धा होत असून मोठ्या आकाराच्या संत्रा फळांचा दर ३० जानेवारी रोजी २५०० ते २८०० रुपये प्रती क्‍विंटल होता. १ हजार क्‍विंटल संत्रा फळांची आवक या दिवशी झाली. या दरात घसरण होत हे दर आता १६०० ते १९०० रुपये प्रती क्‍विंटल झाले आहेत. ३०० क्‍विंटलची आवक २ फेब्रुवारी रोजी झाली. मोठ्या आकाराच्या मोसंबी फळांची १२०० क्‍विंटलची आवक ३० जानेवारीला झाली. २००० ते २५०० रुपये प्रती क्‍विंटल असा मोसंबीची दर होता. २ फेब्रुवारी रोजी हेच दर २००० ते २४०० रुपयांवर पोचले तर आवक ६०० क्‍विंटलची झाली. बाजारात नाशिकच्या द्राक्षाचीदेखील आवक होत आहे. २०० ते ३०० क्‍विंटल अशी सरासरी आवक असून ४००० ते ५००० रुपये क्‍विंटल असा दर आहे. डाळिंबाची सरासरी आवक १००० क्‍विंटलची आहे.१००० ते ६००० रुपये क्‍विंटल दरावर डाळिंब स्थिरावले आहे. ६०० ते ८०० रुपये क्‍विंटल असलेल्या बटाट्याचे दर ५०० ते ८०० रुपये असे झाले. ३००० क्‍विंटलपेक्षा अधिकची बटाट्याची बाजारातील आवक आहे. लाल कांदा २४०० ते ३००० रुपये क्‍विंटल असून पांढऱ्या कांदयाचे दर १५०० ते १९०० रुपये असे आहेत. बाजारातील कांद्याची आवक १००० क्‍विंटलची आहे.
Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.
ताज्या कृषी घडामोडींसाठी फेसबुक, ट्विटर, इन्स्टाग्राम , टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.