कळमणा बाजारात सोयाबीनची आवक वाढली; दर स्थिर

नागपूर ः सोयाबीनच्या आवकेने कळमणा बाजार समितीचा परिसर फुलला आहे. सोयाबीनची रोज सरासरी पाच हजार क्‍विंटलची आवक असल्याची माहिती व्यापारी सूत्रांनी दिली. २७०० ते ३००० रुपये क्‍विंटल या दराने सोयाबीनचे व्यवहार होत असून त्यात सध्या तरी वाढ होण्याची शक्‍यता नसल्याचे सांगण्यात आले.

हंगामातील सोयाबीनची आवक विदर्भातील सर्वच बाजार समित्यांमध्ये होत आहे. गेल्या आठवड्यात चार हजार क्‍विंटल एवढी आवक होती. त्यात वाढ होऊन ती आवक या आठवड्यात पाच हजार क्‍विंटलवर पोचली आहे. यापुढील काळात ही आवक आणखी वाढण्याची शक्‍यता असली तरी तूर्तास दरात वाढीची अपेक्षा नसल्याचे सांगण्यात आले. स्थानिक प्रक्रिया उद्योजकांची मागणी वाढली तरच दर वाढतील, असेही व्यापारी सूत्रांकडून सांगण्यात आले.

सुरवातीला २७०० ते ३०६४ रुपये क्‍विंटलचे दर सोयाबीनचे होते. या आठवड्यात २६०० ते ३१२० रुपये क्‍विंटलवर ते पोचले. बाजारात हरभऱ्याची २५० ते ३०० क्‍विंटल अशी जेमतेम आवक आहे. ३५०० ते ४१०० रुपये क्‍विंटलचे दर हरभऱ्याला गेल्या आठवड्यात असताना या आठवड्यात ते ३५५० ते ४००० रुपयांवर आले. तूरीची देखील २५० ते ३०० क्‍विंटल अशी सरासरी आवक आहे. ३२०० ते ३४३६ रुपये क्‍विंटल असा तुरीला दर होता. या आठवड्यात ३४५० ते ३७०० रुपये क्‍विंटलवर ते पोचले. मुगाची १९ क्‍विंटलची आवक होत ४००० ते ४२०० रुपयांचा दर मिळाला. सरबती गव्हाची १०० क्‍विंटलची आवक आहे. २५०० ते २९०० रुपयांवर गव्हाचे दर स्थिरावले आहेत. २२०० ते २५०० रुपये क्‍विंटलवर लुचई तांदूळ स्थिर असून आवक जेमतेम ५० क्‍विंटलची आहे.

संत्रा-मोसंबीची आवक मोठ्या आकाराच्या मोसंबी फळांचे व्यवहार २२०० ते २४०० रुपये क्‍विंटलने होत आहेत. ३००० क्‍विंटलची मोसंबीची आवक आहे. संत्र्याची देखील बाजारात आवक असून मोठ्या आकाराच्या फळांना १४०० ते १७०० रुपये क्‍विंटलचा दर असून आवक २२०० क्‍विंटलची आहे.