नागपुरात सोयाबीन २८५० ते २९५० रुपये

नागपूर ः पंधरवाड्यापूर्वी २३०० ते २५०० रुपये क्‍विंटल असलेल्या सोयाबीनमध्ये तेजी आली आहे. गेल्या सप्ताहात सोयाबीन २८५० ते २९५० रुपये प्रति क्‍विंटलवर पोचले. सोयाबीनची आवक कमी झाल्याने येत्या काळात सोयाबीन दरात आणखी वाढ होण्याचा अंदाज वर्तविला जात आहे. सोयाबीनची आवक वाढती असल्याने बाजारात दर खाली आले होते. सोयाबीन अवघे २३०० रुपयांपासून विकले गेले. गेल्या आठवड्यात मात्र सोयाबीनची आवक मंदावली. परिणामी सोयाबीन दरातही तेजीचा अनुभव शेतकरी घेत आहेत. सोयाबीन २९५० रुपयांपर्यंत पोचले असून, यामध्ये आणखी तेजीचा अंदाज व्यापारी वर्तवित आहेत. २६ नोव्हेंबर रोजी सोयाबीनची ३२९३ क्‍विंटल आवक झाली. २६०० ते २८५० रुपये प्रति क्‍विंटल दराने सोयाबीनचे व्यवहार झाले. २७ नोव्हेंबर रोजी आवक साडेचार हजार क्‍विंटलवर पोचली आणि दर स्थिर होते. २४ नोव्हेंबर रोजी आवक अर्ध्यावर म्हणजेच २ हजार क्‍विंटलवर पोचली आणि दरात सुधारणा झाली. २९०० रुपये प्रति क्‍विंटलवर दर पोचले. २८ नोव्हेंबर रोजी २९११ रुपये क्‍विंटलचे दर शेतकऱ्यांना मिळाले. दरातील तेजीमागे आवक कमी होणे हे कारण असल्याचे सांगितले जात आहे.  या आठवड्यात सोयाबीनचे व्यवहार २९५० रुपये प्रति क्‍विंटलने होत आहेत. मोठ्या आकाराच्या संत्रा फळांची आवक १२०० क्‍विंटल असून २५०० ते ३१०० रुपये प्रती क्‍विंटने व्यवहार होत आहेत. गेल्या आठवडाभरापासून संत्रा स्थिर असल्याचे सांगण्यात आले. मोठ्या आकाराच्या मोसंबी फळांनाही मागणी आहे. परिणामी, याचेही दर गेल्या आठवडाभरापासून स्थिर आहेत. २७०० ते ३२०० रुपये प्रती क्‍विंटलने मोसंबीचे व्यवहार होत असून ८०० क्‍विंटलची सरासरी आवक आहे. बटाट्याची सरासरी साडेसहा हजार क्‍विंटलची आवक आहे. ७०० ते १००० रुपये प्रति क्‍विंटलने याचे व्यवहार सुरू आहेत.