सोयाबीन लागवडीत ९ टक्के वाढ

नवी दिल्ली: कृषी विभागाच्या ९ ऑगस्टपर्यंतच्या आकडेवारीनुसार देशात १११ लाख हेक्टर क्षेत्रावर सोयाबीनची लागवड झाली आहे. गेल्या वर्षीच्या तुलनेत क्षेत्र नऊ टक्के वाढल्याचे दिसून येते. गेल्या पाच वर्षांतील सरासरीच्या तुलनेत मात्र यंदा लागवड क्षेत्रात किंचित घट झाली आहे.

मध्य प्रदेश, महाराष्ट्र, राजस्थान आणि तेलंगणा या प्रमुख राज्यांत पावसाने साथ दिल्यामुळे सोयाबीनची लागवड वाढल्याने देशातील एकूण सोयाबीन क्षेत्रात वाढ झाली, असे शास्त्रज्ञांनी सांगितले. हजर बाजारात सोयाबीनला चांगला भाव असल्यामुळे मध्य प्रदेशात गेल्या वर्षीच्या तुलनेत सोयाबीन लागवडीत ११ टक्के वाढ झाली. मध्य प्रदेश आणि महाराष्ट्रात सोयाबीन वाढीच्या अवसथेत असून, किडींचा प्रादुर्भाव वाढला आहे. शेतकऱ्यांनी वारंवार पिकाची पाहणी करून आवश्यकता भासल्यास कीडनाशकांची योग्य त्या प्रमाणात फवारणी करावी, असा शास्त्रज्ञांचा सल्ला आहे. किडींचा सुरवातीच्या टप्प्यातच बंदोबस्त केला, तर पिकाचे मोठे नुकसान टळू शकते, असे शास्त्रज्ञ म्हणाले.

वास्तविक सोयाबीनची पेरणी जुलैच्या तिसऱ्या आठवड्यापर्यंत पूर्ण करणे अपेक्षित असते. काही शेतकरी मात्र ऑगस्टच्या पहिल्या आठवड्यापर्यंत पेरण्या लांबवतात. पण त्यामुळे पिकाच्या उत्पादनावर विपरित परिणाम होतो, याकडे शास्त्रज्ञांनी लक्ष वेधले. प्रमुख सोयाबीन उत्पादक राज्यांमध्ये झालेला समाधानकारक पाऊस आणि तुलनेने किफायतशीर बाजारभाव यामुळे यंदा शेतकऱ्यांचा सोयाबीनकडे अधिक ओढा राहिला, असे व्यापाऱ्यांनी सांगितले.

देशातील एकूण तेलबिया उत्पादनात सोयाबीनचा वाटा तब्बल ४० टक्के इतका मोठा आहे. देशातील निम्म्याहून अधिक सोयाबीन मध्य प्रदेशमध्ये पिकवला जातो.