बुलडाणा जिल्ह्यात पाणीटंचाईच्या आढाव्यासाठी पथक दाखल

पाणीटंचाईच्या आढाव्यासाठी पथक दाखल
पाणीटंचाईच्या आढाव्यासाठी पथक दाखल

बुलडाणा : जिल्ह्यात निर्माण झालेल्या तीव्र पाणीटंचाईच्या पार्श्वभूमिवर पाहणीसाठी राज्याच्या पाणीपुरवठा विभागाचे पथक दाखल झाले आहे. हे पथक दोन दिवस पाहणीनंतर आपला अहवाल शासनाकडे सादर करेल. जिल्ह्यात या वर्षी टँकरने पाणीपुरवठा करण्यासारखी भीषण परिस्थिती अोढवली आहे. सध्या ८५ पेक्षा अधिक टँकरद्वारे पाणीपुरवठा सुरू आहे. लवकरच हा आकडा शंभरी पार करण्याची शक्यता आहे.

जिल्ह्यात या मोसमात सुमारे ७५ टक्केच पाऊस झाला आहे. शिवाय जो पाऊस झाला तोसुद्धा खंडमय होता. दोन पावसांत बरेच अंतर असल्याने जेमतेम खरीप पिके आली; परंतु त्याचा रब्बीवर ताण पडला. प्रकल्प कोरडेच राहिले. परिणामी दिवाळीनंतरच पाणी समस्येने तोंड वर काढण्यास सुरुवात केली. मागील तीन वर्षांत पहिल्यांदा इतकी भीषण पाणीटंचाई उद्भवलेली आहे. या परिस्थितीचा वस्तुनिष्ठ आढावा घेण्यासाठी राज्याचे पाणीपुरवठा विभागाचे अवर सचिव प्र. वि. कानडे, कक्ष अधिकारी असे चौघे दौऱ्यावर आले आहेत. हे पथक बुलडाणा, मोताळा, खामगाव, शेगाव, सिंदखेडराजा, देऊळगावराजा आदी तालुक्यांमध्ये भेटी देऊन पाहणी करेल.

प्रकल्प कोरडे असल्याने पाणीपुरवठा करणाऱ्या योजना ठप्प पडत आहेत. ९३ गावांची तहान सध्याच टँकरद्वारे भागवावी लागत असून, आगामी तीन महिन्यांचा काळ हा प्रशासनाच्या कसोटीचा राहणार आहे. दर दिवसाला टँकरची मागणी वाढत आहे. जिल्ह्यात संपूर्ण १३ तालुके यापूर्वीच दुष्काळी जाहीर झाले आहेत. ९०० पेक्षा अधिक गावे टंचाईग्रस्त असून, येत्या मे महिन्यात या जिल्ह्यात किमान २५० पेक्षा जास्त गावांना टँकरने पाणीपुरवठा करावा लागणार असल्याची भीती यंत्रणांना वाटते आहे.

 पाणीपातळी या वर्षी दीड मीटरने खोल गेली आहे. हे पथक ठिकठिकाणी पाहणी करून नागरिकांसोबत चर्चा करेल. त्यानंतर उपाययोजनांची स्थिती, भविष्यात करावयाच्या उपाययोजना याबाबत सविस्तर अहवाल प्रधान सचिवांना देणार असल्याची माहिती मिळाली.

Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.

ताज्या कृषी घडामोडींसाठी फेसबुक, ट्विटर, इन्स्टाग्राम टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.

Related Stories

No stories found.
Agrowon
agrowon.esakal.com