सांगलीत फळपीक विमा योजनेअंतर्गत अर्ज भरणा सुरू

सांगली ः २०१८-१९ मधील आंबे बहरासाठी पंतप्रधान पीकविमा योजनेअंतर्गत पुनर्रचित हवामान आधारित फळपीक विमा योजना अधिसूचित मंडळातील फळपिकासाठी राबविण्यात येणार आहे. या योजनेअंतर्गत द्राक्ष, डाळिंब, केळी, पेरू, आंबा आणि लिंबू या अधिसूचित फळपिकांचा समावेश आहे. द्राक्षांचा विमा रक्कम भरण्याची १५ ऑक्‍टोबर मुदत देण्यात आली आहे. तर अांब्यासाठी डिसेंबरअखेर मुदत अाहे.

वित्तीय संस्थाकडे पीककर्जासाठी अर्ज केलेल्या व ज्यांची अधिसूचित फळपिकांसाठी कर्जमर्यादा मंजूर आहे. अशा सर्व कर्जदार शेतकऱ्यांना ही योजना सक्तीची आहे. बिगर कर्जदार शेतकऱ्यांनी ही योजना ऐच्छिक आहे. फळपिकांचे बाजारमूल्य अधिक असल्याने शेतकऱ्यांना चांगले उत्पन्न मिळते. तसचे फळपिकांचे हवामान धोक्‍यापासून अपेक्षित उत्पन्न मिळाले नाही, तर होणारा तोटाही मोठा असतो.

हवामान धोक्‍यापासून विमा संरक्षण देण्यासाठी पंतप्रधान फसल विमा योजनेअंतर्गत पुनर्रचित हवामान आधारित पीकविमा योजनेची अंमलबजावणी करण्यात येत आहे. या योजनेत सहभागी होण्यासाठी आपला विमा हप्ता जवळच्या बॅंकेत कमा करावा लागणार आहे. या योजनेसाठी तालुका कृषी अधिकारी आणि मंडल कृषी अधिकारी यांच्याशी संपर्क साधावा, असे आवाहन कृषी विभागाने केले आहे.