प्रत्येक जिल्ह्यात स्टार्ट अपचे आयोजन

मुंबई : ग्रामीण भागात विविध नव संकल्पना उपलब्ध असून त्यांना योग्य ती संधी निर्माण करून देण्याच्या उद्देशाने प्रत्येक जिल्ह्यात राज्याच्या धर्तीवर स्टार्ट अप सुरू करणार असल्याचे प्रतिपादन राज्याचे कौशल्य विकास व उद्योजकता मंत्री संभाजी पाटील निलंगेकर यांनी केले.  राज्य कौशल्य विकास व उद्योजकता विभाग आणि महाराष्ट्र राज्य नावीन्यता सोसायटीमार्फत राबविण्यात आलेल्या ‘महाराष्ट्र स्टार्ट अप’ सप्ताह २०१८ च्या सांगता समारंभात ते बोलत होते. या प्रसंगी एस बँक आणि कौशल्य विकास व उद्योजकता विभाग यांत सामंजस्य करार करण्यात आला. मुंबईत ‘महाराष्ट्र स्टार्ट अप’ सप्ताह, २५ ते २९ जूनपर्यंत आयोजित करण्यात आला होता. या सप्ताहाच्या सांगता समारंभात १०० स्टार्ट अपची सादरीकरणासाठी निवड करण्यात आली होती. यातून प्रत्येक क्षेत्रातील तीन अशा २४ उत्कृष्ट कल्पनांची निवड स्टार्ट अप सुरू करण्यासाठी केली असून, या कार्यक्रमात निवडलेल्या २४ स्टार्ट अपना १५ लाखांपर्यंतच्या कामाचे कार्यादेश समारंभात प्रदान करण्यात आले. या वेळी ज्‍येष्ठ शास्त्रज्ञ तथा महाराष्ट्र राज्य नावीन्यता सोसायटीचे सहअध्यक्ष रघुनाथ माशेलकर, एस बँकेच्या ग्लोबल हेड नमिता मिश्रा व इतर मान्यवर उपस्थित होते. श्री. निलंगेकर म्हणाले, की २४ स्टार्ट अप हे फक्त कागदोपत्री नसून १५ लाखांची वर्क ऑर्डर देण्यात आली आहे, यात प्रत्येक बाबतीत पारदर्शकता आहे. १०० मधील उरलेल्या ७६ स्टार्ट अपना पुन्हा पुढील नव्या स्टार्ट अप सप्ताहात संधी मिळणार आहे. तर ज्‍येष्ठ शास्त्रज्ञ श्री. माशेलकर म्हणाले, ‘स्टार्ट अप’ सप्ताह २०१८ हा असा नावीन्यपूर्ण उपक्रम आहे जो जगाच्या इतिहासात पहिल्यांदा भारतातच नव्हे तर महाराष्ट्रात घडत आहे. चांगल्या विचारांबरोबर चांगली कृती असणे महत्त्वाचे असते, त्यामुळे उत्तम कृतीतून हा कार्यक्रम राबविण्यात आला आहे. विभागाचे सचिव असीम गुप्ता म्हणाले, ही कल्पना गेले सात महिने उत्तमरित्या राबविण्यात आली. त्यामुळे हे पहिले स्टार्ट अप पूर्ण झाले.  २४ स्टार्ट अपची निवड कृषी, शिक्षण व कौशल्य विकास, आरोग्य सेवा, पायाभूत सुविधा व वाहतूक व्यवस्था, फीनटेक आणि सायबर सुरक्षा, शाश्वत विकास, गव्हर्नन्स आणि इतर अशा आठ क्षेत्रांतून स्टार्ट अपसाठी युवक तसेच सर्वांकडून २ हजार अर्ज मागविण्यात आले होते. त्यापैकी ९०० स्टार्ट अपनी नोंदणी केली होती. प्रत्येक क्षेत्रातील तीन अशा २४ उत्कृष्ट कल्पनांची स्टार्ट अप सुरू करण्यासाठी निवड केली गेली आहे. या २४ स्टार्ट अपना १५ लाख रुपयांपर्यंतची कंत्राटे शासनाकडून देण्यात येणार आहेत.