'त्या' किडनाशकांच्या बाबतीत पुनर्विचार करा

'त्या' किडनाशकांच्या बाबतीत पुनर्विचार करा
'त्या' किडनाशकांच्या बाबतीत पुनर्विचार करा

कृषी विभागाचे सीआयबीकडे पत्राद्वारे साकडे नागपूर : फवारणी दरम्यान विषबाधा झाल्याने राज्यात सुमारे ५१ जणांचे तर यवतमाळ जिल्ह्यात २२ जणांचे बळी गेले. त्या पार्श्‍वभूमीवर काही अतीजहाल किडनाशकांच्या बाबत पुनर्विचार करावा, अशी मागणी केंद्रीय किडनाशक बोर्डाकडे (सीआयबी) करण्यात आल्याची माहिती, अवर मुख्य सचिव (कृषी) विजयकुमार यांनी दिली. यवतमाळ जिल्ह्यात बोंडअळीचा प्रादुर्भाव झाला. त्यानंतर संभ्रमावस्थेत असलेल्या शेतकऱ्यांच्या मानसिकतेचा फायदा घेत कृषी सेवा केंद्रातून त्यांना अतीजहाल आणि शिफारसीत नसलेल्या किडनाशकांची विक्री करण्यात आली. काही किडनाशक एकत्रित करण्याची शिफारस नसतानादेखील त्यांचे मिश्रण करून फवारण्यात आले. या सर्वांच्या परिणामी विषबाधा झाल्याने एकट्या यवतमाळ जिल्ह्यात २२ शेतकऱ्यांचे बळी गेले. राज्यात फवारणी दरम्यान मरणाऱ्यांची संख्या ५१ वर पोचली. त्यानंतर कृषी विभागाकडून झाडाझडती घेत तब्बल पाच किडनाशकांवर बंदी घालण्यात आली. ६० दिवसांच्या बंदीनंतर पुन्हा नव्याने ३० दिवसांची बंदी लादण्यासंदर्भाने अहवाल कृषी आयुक्‍तालयाकडे पाठविण्यात आला आहे. परंतु अद्याप कृषी आयुक्‍तालय स्तरावरून त्यास मान्यता मिळाली नाही. सध्या हंगाम नसल्याने हे घडल्याचे सूत्र सांगतात. हंगामाच्या सुरवातीला या पाच जहाल किडनाशकावर पुन्हा ३० दिवसांची बंदी लादली जाण्याची शक्‍यता असल्याचेही सूत्रांनी सांगितले.

केंद्राच्या अखत्यारितील प्रश्‍न राज्य सरकारला किडनाशकांवर केवळ ९० दिवसांची बंदी लादण्याचे अधिकार आहेत. त्यामुळे मानवी आरोग्यावर परिणाम करणाऱ्या काही किडनाशकांच्या बाबतीत केंद्रीय किडनाशक बोर्डाने पुनर्विचार करावा, अशी मागणी राज्याच्या कृषी विभागाने केली आहे. पंधरवाड्यापूर्वी ही मागणी करण्यात आली, परंतु या संदर्भात अद्याप कोणतीच माहिती व खुलासा अद्याप सीआयबीकडून झाला नसल्याचे सूत्र सांगतात. किडनाशक लॉबी मोठी असल्याने त्यांच्यावर बंदी लादण्यासाठी अनेकजन धजत नसल्यामुळे सीआयबीला निर्णय घेणे कठीण होते, असेही सूत्रांकडून सांगण्यात आले. 

Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.

ताज्या कृषी घडामोडींसाठी फेसबुक, ट्विटर, इन्स्टाग्राम टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.

Related Stories

No stories found.
Agrowon
agrowon.esakal.com