राज्य बॅंकेकडून साखर तारण कर्जाचा दुरावा

कोल्हापूर : राज्य बँकेने मालतरण कर्जासाठी आवश्‍यक असणारा दुरावा हा १५ टक्क्यांवरून १० टक्के आणण्याचा महत्त्वपूर्ण निर्णय घेतला आहे. यामुळे साखर कारखान्यांना साखर मालतारणापोटी २९०० रुपये इतक्‍या दरावर १० टक्के दराने २६१० रुपये इतकी रक्कम कर्जापोटी जमा होईल, अशी माहिती राज्य बॅंकेचे प्रशासक विद्याधर अनास्कर यांनी दिली राज्य बॅंकेने मूल्यांकनात नुकतीच प्रति क्विंटल २०० रुपयांनी वाढ केली आहे. यामुळे २७०० रुपयांवरून मूल्यांकन २९०० रुपये इतके झाले आहे.  साखर उद्योगाला सावरण्यासाठी राज्य बॅंकेनेही पावले आश्‍वासक पावले उचलली आहेत. यामुळे येणारा कारखान्यांचा हंगाम नक्कीच समाधानकारक जाईल असा आशावाद त्यांनी वयक्त केला. २६१० रुपयांतून कारखान्यांना येणे कर्जापोटी ५०० रुपये अधिक प्रक्रिया कर्जापोटी २५० अशी ७५० रुपये वजावट करून १८६० रुपये कारखान्यांना उपलब्ध होईल. यापुढे जाऊन बॅंकेने आणखीन एक चांगला निर्णय घेतला आहे. साखर मालतारण कर्जापोटी राखून ठेवलेल्या १० टक्के दुराव्याची रक्कम संबंधित कारखान्यांना हवी असल्यास त्यांनी त्या पोटी कारखान्याची किंवा कारखान्याच्या संचालकांची अतिरिक्त मालमत्ता राज्य बॅंकेच्या तारणात दिल्यास त्यांना साखर मालतारणापोटी शंभर टक्के देण्याचाही निर्णय घेतला आहे. राज्य बॅंकेने साखर दर वाढताच तातडीने मूल्यांकन वाढविले. याचा फायदा पुढील गळितास होणार आहे. पुढील हंगामासाठी पूर्वहंगामी कर्ज देणे राज्य बॅंकेस शक्‍य होणार असल्याने कारखाने वेळेत सुरू होऊन पुढचा गळीत हंगाम सुरळीत राहू शकेल, असे श्री. अनास्कर यांनी सांगितले.