तेलबिया महामंडळाची जमीन विक्रीला

मुंबई : बंद पडलेल्या महाराष्ट्र राज्य तेलबिया व्यापार आणि उद्योग महामंडळाची अमरावती येथील जमीन राज्य सरकारने विक्रीला काढली आहे. २३ एकर क्षेत्रफळ असलेल्या या मोक्याच्या जमिनीसाठी सर्वाधिक १६१ कोटी रुपयांची बोली लागली आहे. पणन राज्यमंत्र्यांकडून याविषयी हिरवा कंदील आला की या जमीन विक्रीचा मार्ग मोकळा होणार असल्याचे सूत्रांनी स्पष्ट केले आहे.

राज्य सरकारने तेलबिया व्यापार आणि उद्योग महामंडळ १९९९ मध्येच बंद केले आहे. मात्र, कामकाज बंद झाले असले तरी महामंडळाच्या जमिनीच्या देखभालीवर वर्षाकाठी लाखो रुपयांचा खर्च राज्य सरकारला करावा लागत आहे. महामंडळाची अमरावतीमध्ये मोक्याच्या ठिकाणी २३ एकर जमीन आहे.

हा बिनकामाचा खर्च वाचवण्यासोबतच याठिकाणी अतिक्रमण झाल्यास नसती डोकेदुखी टाळण्याच्या हेतूने महामंडळाची ही जमीन विक्रीला काढण्याचा निर्णय घेण्यात आला आहे. वित्त विभागानेसुद्धा या विक्रीला परवानगी दिली आहे. पणन खात्याच्या अखत्यारीत महामंडळ येते. त्यानुसार, पणन खात्याने जमीन विक्रीचा प्रस्ताव तयार करून खरेदीदारांकडून टेंडर मागवले होते.

पणन विभागाकडून या जमिनीची बाजारभावाने किती किंमत होईल याचा अंदाज घेण्यात आला आहे. यात सर्वाधिक १६१ कोटी रुपयांची बोली लावणाऱ्यास ही जमीन विक्री करण्याचे विचाराधीन आहे. पणन खात्याने त्यासाठी राज्याच्या वित्त विभागाची परवानगी घेतली आहे. त्यानंतर पुढील मंजुरीसाठी हा प्रस्ताव पणन खात्याचे राज्यमंत्री सदाभाऊ खोत यांच्याकडे पाठवण्यात आला आहे. गेली तीन आठवडे ही फाईल राज्यमंत्री खोत यांच्याकडे निर्णयासाठी प्रलंबित आहे.