पोर्टलवर गावे दिसत नसली तरी विमा हप्ता स्वीकारा : राज्य शासनाच्या सूचना

पिकविमा
पिकविमा

पुणे: प्रधानमंत्री पीकविमा योजनेसाठी पोर्टलवर काही गावांची नावे उपलब्ध होत नसली तरी बिगर कर्जदार शेतकऱ्यांचे विमा हप्ते बॅंकांनी भरून घ्यावेत, अशा सूचना राज्य शासनाने दिलेल्या आहेत.  मंगळवारी दुपारपर्यंत राज्यातील ७६ लाख शेतकऱ्यांनी विमा अर्ज भरले होते. रात्री बारा वाजेपर्यंत हा आकडा ८० लाखांच्या पुढे जाण्याची शक्यता आहे.  बुधवारपासून विमा तपशील भरण्याची सुविधा पोर्टलवर आता फक्त बँक व जिल्हा सहकारी बँकांकरिताच उपलब्ध करून देण्यात आलेली आहे. ‘‘पोर्टलवर काही गावांची नावे उपलब्ध होत नाहीत. मात्र, बॅंकांनी अशा गावांमधील शेतकऱ्यांचा विमाहप्ता भरून घेणे नाकारू नये. शासनाने त्या गावांचे महसूल मंडळ अधिसूचित केलेली असतील तर अशा गावांतील शेतकऱ्यांचा विमा हप्ता बँकांनी स्वीकारावा. मान्यता दिलेल्या तारखांनुसार विमा प्रस्ताव तयार करून बॅंकांकडून विमा कंपनीकडे पाठवता येतील,’’ असे सूत्रांनी स्पष्ट केले.  विम्यासाठी नोंदणी करण्याकरता कर्जदार व बिगर कर्जदार शेतकऱ्यांसाठी ३१ जुलै अंतिम मुदत होती. त्यामुळे आपले सरकार सेवा केंद्र, बँक, विमा कंपनीचे अधिकृत प्रतिनिधी यांच्या मदतीने शेतकरी मंगळवारी दिवसभर अर्ज भरण्यात व्यस्त होते. त्यामुळे सर्व्हरवरील ताणदेखील वाढलेला होता. बिगर कर्जदार शेतकऱ्यांचे अर्ज आपले सरकार सेवा केंद्र व विमा कंपन्या केवळ मंगळवारच्या रात्री १२ वाजेपर्यंत पोर्टलवर अपलोड केले जात होते.  राष्ट्रीयकृत, व्यापारी व जिल्हा बँकांमार्फत शेतकऱ्यांचे अर्ज स्वीकारून बिगर कर्जदार शेतकऱ्यांना आपला विमा हप्ता रोख, ऑनलाइन, डिमांड ड्रॉफ्टद्वारे रात्री बारापर्यंत बँकेकडे जमा करता करण्याची संधी होती. आजपासून (ता.१) ही सुविधा मात्र उपलब्ध नसेल. शेतकऱ्यांचे विमा प्रस्ताव आता ग्रामीण बँका, व्यावसायिक बँका, खासगी बँकांकडून विमा कंपनीकडे ९ ऑगस्टपर्यंत जातील. तसेच, प्राथमिक कृषी सहकारी संस्थांकडून जिल्हा सहकारी बँकांकडे ९ ऑगस्टला जाईल, असे सूत्रांचे म्हणणे आहे.

Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.

ताज्या कृषी घडामोडींसाठी फेसबुक, ट्विटर, इन्स्टाग्राम टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.

Related Stories

No stories found.
Agrowon
agrowon.esakal.com