आषाढीनिमित्त पंढरपुरात राज्यस्तरीय कृषी प्रदर्शन

सोलापूर  : आषाढी यात्रेनिमित्त कृषी उत्पन्न बाजार समितीमध्ये राज्यस्तरीय कृषी प्रदर्शनाचे आयोजन करण्यात आले आहे. हे प्रदर्शन येत्या २१ ते २५ जुलैदरम्यान होणार असून, २२ जुलै रोजी मुख्यमंत्री देवेंद्र फडणवीस यांच्या उपस्थितीत शेतकरी मेळावा व कृषी प्रदर्शनाचे उद्‌घाटन होणार आहे, अशी माहिती आमदार प्रशांत परिचारक यांनी दिली. या वेळी बाजार समितीचे सभापती दिलीप घाडगे, उपसभापती विवेक कचरे उपस्थित होते.

दरवर्षी आषाढी एकादशीनिमित्त विठुरायाच्या दर्शनासाठी लाखो वारकरी व शेतकरी पंढरपुरात येतात. त्यांना कृषी क्षेत्रातील नवीन तंत्रज्ञानाची माहिती व्हावी, विविध संशोधित औजारे व मशिनरी यांचे प्रात्यक्षिक पाहता यावे, देशी गायींचे संगोपन, शासनाच्या विविध योजनांची माहिती मिळावी, यशस्वी शेतकऱ्यांची यशोगाथा अनुभवता यावी, यासाठी प्रदर्शनाचे आयोजन करण्यात येते. प्रदर्शनाचे हे तिसरे वर्ष असून, यंदा प्रदर्शनासोबतच देशी गायींचे प्रदर्शनदेखील आयोजित करण्यात आले आहे. यामध्ये प्रामुख्याने खिलार, गीर, लाल कंधारी, देवणी, कोकण गिड्डा आदी जातींच्या पशुधनाचा समावेश आहे.

 या प्रदर्शनामध्ये ३०० पेक्षा जास्त स्टॉल्स, प्रात्यक्षिके, पाच एकर क्षेत्रावर सेंद्रिय शेतीमाल महोत्सव, देशी बियाणे प्रदर्शन, महिला बचत गट अशा वेगवेगळ्या दालनांचा समावेश आहे. या प्रदर्शनाचा जास्तीत जास्त वारकरी व शेतकऱ्यांनी लाभ घ्यावा, असे आवाहन घाडगे यांनी केले आहे.